سوال: میرا سوال یہ ہے کہ میری نوکری ایئرپورٹ پر ایسی جگہ اور وقت پر ہوتی ہے، جہاں جمعہ کی نماز اکثر جماعت سے پڑھنا ممکن نہیں ہوپاتا اور مجھے اس بات کا شدید افسوس ہوتا ہے، اس صورت میں کیا کروں؟ رہنمائی فرمائیں۔

جواب: واضح رہے کہ بلا عذر جمعہ کی نماز چھوڑنا سخت گناہ ہے، احادیث مبارکہ میں اس پر سخت وعیدیں آئی ہیں، چنانچہ ایک حدیث میں آتا ہے:
’’ حضرت ابی الجعد ضمیری راوی ہیں کہ رسول اللہ صلی اللہ علیہ وسلم نے فرمایا :جو آدمی محض سستی و کاہلی کی بنا پر تین جمعے چھوڑ دے گا، اللہ تعالیٰ اس کے دل پر مہر لگا دے گا‘‘۔ (سنن الترمذی: رقم الحدیث: 500)
ایک اور روایت میں ہے :
’’ حضرت عبداللہ ابن عباس رضی اللہ تعالیٰ عنہما راوی ہیں کہ رسول اللہ صلی اللہ علیہ وسلم نے فرمایا: ’’جو آدمی بغیر کسی عذر کے نماز جمعہ چھوڑ دیتا ہے، وہ ایسی کتاب میں منافق لکھا جاتا ہے جو نہ کبھی مٹائی جاتی ہے اور نہ تبدیل کی جاتی ہے‘‘. اور بعض روایات میں یہ ہے کہ ’’جو آدمی تین جمعے چھوڑ دے‘‘۔
(مشکوٰۃ المصابیح، رقم الحدیث:1379)
ذکر کردہ صورت میں آپ کو چاہیے کہ جمعہ کی ادائیگی کی ہر ممکن کوشش کریں، اگر کسی ایک جگہ جمعہ نکل جائے، تو دوسری مسجد میں جا کر جمعہ ادا کریں، اور اگر آپ کسی بھی جگہ جمعہ کی نماز نہ پاسکیں، تو آپ پر ظہر کی نماز ادا کرنا لازم ہے۔