سوال: رسول اللہ ﷺنے فرمایا: جو شخص ہر جمعہ کو والدین کی یا ان میں سے کسی ایک کی قبر کی زیارت کرتا ہے، تو اس کی مغفرت کردی جاتی ہے اور اسے ( والدین کا ) فرمانبردارر لکھ دیا جاتا ہے۔(طبرانی کبیر :193، عن ابی ہریرہ رضی اللہ عنہ ) براہ کرم اس حدیث کے متعلق وضاحت فرمائیں۔

جواب: سوال میں ذکرکردہ حدیث سند کے اعتبار سے اگرچہ ضعیف ہے، لیکن اس حدیث کا شاہد موجود ہونے کی وجہ سے اس حدیث کو تقویت مل جاتی ہے اور سند میں موجود ضعف کم ہوجاتاہے، لہذا اس حدیث کو بیان کرنا درست ہے۔نیز یہ بھی واضح رہے کہ اس روایت میں والدین کی قبر کی زیارت کرنے پر گناہوں کی معافی کا ذکر ہے، اس سے مراد "صغیرہ گناہ" ہیں، کیونکہ "کبیرہ گناہ" بغیر توبہ کے معاف نہیں ہوتے ہیں نیز محدثین کرام ؒ نے ہر جمعہ والدین کی قبر کی زیارت کو مستحب فرمایا ہے۔
اس روایت کا ترجمہ،تخریج اور اسنادی حیثیت مندرجہ ذیل ہے:
ترجمہ:حضرت ابوہریرہ رضی اللہ عنہ سے روایت ہے کہ جناب رسول اللہ ﷺ نے ارشاد فرمایا: جس شخص نے ہرجمعہ کو اپنے ماں باپ یا ان میں سے کسی ایک کی قبر کی زیارت کی، تو اس کی مغفرت کر دی گئی اور اس کو فرمانبردار لکھ دیا گیا۔(المعجم الاوسط، حدیث نمبر: 6114 )
تخریج الحدیث:
1۔ اس روایت کو امام طبرانی (م 360ھ) نے’’المعجم الاوسط‘‘(6/175، رقم الحدیث: 6114 ،ط: دار الحرمين ) اور’’ المعجم الصغیر‘‘ (2/16)، رقم الحدیث: 955 ، ط: المكتب الإسلامی) میں ذکر کیا ہے۔
۲۔حكيم الترمذی(م 320ھ)’’ نوادر الأصول ‘‘(1/97)،رقم الحديث: 150،ط: دار النوادر) میں ذکر کیا ہے۔
۳۔ امام بیہقی(م 458ھ) نے’’شعب الایمان ‘‘(6/7901)،رقم الحديث: ،201،ط: دار الكتب العلمية) میں ذکر کیا ہے۔
۴۔امام ديلمی(م 509ھ)نے’’مسند فردوس ‘‘(3/495)، رقم الحدیث: 5537،ط: دار الكتب العلمية) میں ذکر کیا ہے۔
۵۔علامہ قزوینی (م 623ھ)التدوين في أخبار قزوين(1/301،ط: دار الكتب العلمية) میں ذکر کیا ہے۔
۶۔علامہ "ابن ابی الدنیا" نے "مکارم الاخلاق" ( 83)، رقم الحدیث: 249،ط: مكتبة القرآن) میں اس روایت کو مرفوعاً نقل کیا ہے۔ میں ذکر کیا ہے۔
شاھد الحدیث:
مذکورہ روایت الفاظ کے کچھ فرق کے ساتھ حضرت ابوبکر صدیق رضی اللہ عنہ سے نقل کی گئی ہے، جس کا ترجمہ درج ذیل ہے۔
ترجمہ:حضرت ابوبکر صدیق رضی اللہ عنہ سے روایت ہے کہ جناب رسول اللہ ﷺ نے ارشاد فرمایا: جس شخص نے ہر جمعہ کو اپنے ماں باپ یا ان میں سے کسی ایک کی قبر کی زیارت کی اور ان دونوں کی قبر یا کسی ایک کی قبر کے پاس سورۃ یسین پڑھی، تو سورۃ یسین کے ہر آیت یا حرف کی تعداد کے برابر اس کے گناہوں کی مغفرت کر دی گئی۔(ترتيب الأمالي الخميسية للشجری،حديث نمبر: 169، ط: دار الكتب العلمية )
مذکورہ روایت کی اسنادی حیثیت:
علامہ عراقی (م 806ھ) نے اس روایت پر کلام کرتے ہوئے فرمایا:اس روایت کو امام طبرانی (م 360ھ)نے المعجم الاوسط اور المعجم الصغیر میں حضرت ابوہریرہ رضی اللہ عنہ سے نقل کیا ہے اور حافظ ابن ابی الدنیا (م 281ھ)نے محمد بن نعمان سے مرفوعاًنقل کیا ہے اوروہ روایت معضل ہے،محمد بن نعمان مجہول ہے اور ان کا شیخ یحی بن العلاء امام طبرانی (م 360ھ) کے نزدیک متروک ہے ۔
علامہ ہیثمی(م807ھ) نے اس روایت کو نقل کرکے فرمایا: اس روایت میں عبدالکریم ابوامیہ ایک راوی ہیں، جو ضعیف ہیں۔
علامہ مناوی (م 1031ھ)نے اس روایت پر علامہ عراقی(م 806ھ) کا کلام نقل کرنے بعد فرمایاکہ اس مضمون کی ایک روایت بھی حافظ ابن ابی الدنیا (م 281ھ)ابن سیرین ؒ سے نقل کی ہے کہ آدمی کے والدین کا انتقال ہوجاتا ہےاور وہ ان کا نافرمان ہوتا ہے (لیکن) وہ ان کے لیے (برابر)دعاکرتا رہتا ہے تو وہ نیک لوگوں میں لکھ دیا جاتا ہے اور اس روایت علامہ عراقی (م 806ھ) نےصحیح الاسناد کہا ہے۔
علامہ سیوطی (م911ھ) نےاس روایت کو قبر پر یس پڑھنے والی روایت کے شاھد کے طور پر پیش کیا ہے اور اس روایت پر کوئی کلام نہیں کیا ہے ۔
۲۔ والدین کے وفات پانے کے بعد ان کے لیے دعا کرنے کی فضیلت ایک صحیح روایت سے بھی ثابت ہے، جس میں ہے کہ "اگر نافرمان اولاد والدین کی وفات کے بعد اللہ تعالی سے ان کے لیے دعائے مغفرت کرتی ہے، تو اس کو فرمانبردار لکھ دیا جاتا ہے"۔
اس تفصیل سے معلوم ہوا کہ مذکورہ روایت اگرچہ ضعیف ہے،لیکن اس حدیث کا شاہد موجود ہونے کی وجہ سے اس حدیث کو تقویت مل جاتی ہے اور سند میں موجود ضعف کم ہوجاتاہے، لہذا اس حدیث کو بیان کرنا درست ہے۔نیز ہر جمعہ والدین کی قبر کی زیارت کرنا مستحب ہے۔