سوال: السلام علیکم، مفتی صاحب ! اگر امام نے پانچ رکعتیں پڑھادی ہوں، اور نماز کا اعادہ ہو رہا ہو، تو کیا نئے نمازی اس نماز میں شریک ہو سکتے ہیں؟

جواب: نماز کا اعادہ کرنے کی صورت میں نئے مقتدی کی شمولیت کے بارے میں علماء کرام کے مختلف اقوال ہیں۔
فتاویٰ دارالعلوم دیوبند میں ہے کہ اگر امام نے چوتھی رکعت میں قعدہ اخیرہ کرنے کے بعد پانچویں رکعت پڑھائی تھی، تو اس نماز کا اعادہ کرنے کی صورت میں نیا مقتدی اس نماز میں شامل نہیں ہوسکتا، لیکن اگر قعدہ اخیرہ کیے بغیر پانچویں رکعت پڑھائی گئی تھی، تو اس نماز کا اعادہ کرنے کی صورت میں نیا مقتدی اس میں شامل ہوسکتا ہے۔
جبکہ بعض حضرات مطلقاً عدم صحت کے قائل ہیں، اور بعض کے نزدیک نئے آنے والے مقتدی کی نماز صحیح ہے، تاہم اس بارے میں قول فیصل یہ ہے کہ نئے آنے والے مقتدی کو پہلے سے یہ معلوم ہو کہ یہ نماز کا اعادہ ہو رہا ہے، تو اس کے لیے نماز میں شامل ہونا صحیح نہیں ہے، لیکن اگر اس کو معلوم نہ ہو کہ یہ نماز کا اعادہ ہو رہا ہے، تو اس کے نماز میں شامل ہونے سے اس کا فریضہ ساقط ہو جائے گا، اسے دوبارہ اس نماز کو پڑھنے کی ضرورت نہیں ہے۔