سوال: السلام علیکم، میں موٹر وے پولیس میں ہوتا ہوں، ہماری 8 گھنٹے گشت کی ڈیوٹی ہوتی ہے، اور گشت کے دوران اگر چلتے چلتے کسی کو مدد کی ضرورت ہوتی ہے، تو اسکی مدد کرتے ہیں یا اگر کنٹرول سے کوئی کال آجائے تو اسکے مطابق کام کرتے ہیں یا کوئی ٹریفک وائلیشن کرے تو اس کو جرمانہ کرتے ہیں، دوران گشت حالات کے مطابق کبھی کہیں پر کھڑے ہو جاتے اور کبھی روانہ ہوتے ہیں اور اسی طرح 8 گھنٹے گزارتے ہیں۔
اب میرا سوال یہ ہے کہ
1 رات کی ڈیوٹی میں جب ہم کسی ایگ جگہ پر کھڑے ہوتے ہیں، تو قریبی مسجد میں یا گاڑی کے ساتھ روڈ پر کھڑے ہو کر تہجد کے نفل پڑھ سکتے ہیں، جبکہ دوسرا ساتھی گاڑی میں موجود ہے؟
2. باجماعت نماز اور سنت موکدہ کے بارے میں کیا حکم ہے؟
نوٹ. افسران بالا کے احکامات کے مطابق نماز روڈ پر ہی پڑھیں گے، جبکہ باجماعت نماز یا اسی طرح تہجد یا اشراق پڑھتے ہوئے ڈیوٹی پر مامور ساتھی افسر کی ایک آواز پر بندہ آسانی سے گاڑی میں پہنچ سکتا ہے، یعنی کہ نوافل اور باجماعت کی نماز سے صرف افسران بالا کے حکم کی عدولی ہو جاتی ہے، جبکہ ڈیوٹی پر کوئی خاص اثر نہیں پڑتا، کیونکہ دوسرا ساتھی ایک اواز کی دوری پرموجود ہوتا ہے۔ براہ کرم رہنمائی فرمادیں۔ جزاک اللہ

جواب: واضح رہے کہ مسلمان ملازم کے لیے فرض نماز اور سنن موٴکدہ کے بقدر وقت ملازمت کے دورانیہ سے مستثنی ہوتا ہے، اس ليے سب مسلمانوں كو نماز باجماعت مسجد میں ادا کرنا چاہیے، بلا عذر شرعی مسجد کی جماعت ترک نہیں کرنا چاہیے، اس لیے آپ عام حالات میں فرض نمازوں کے لیے مسجد جاکر باجماعت نماز کی ادائیگی کا اہتمام کریں۔
تاہم اگر کبھی ڈیوٹی کی نوعیت ایسی ہوکہ ڈیوٹی پر موجود سب ساتھی ڈیوٹی چھوڑ کر ایک ساتھ مسجد نہ جاسکتے ہوں، اور کچھ کو ڈیوٹی پر موجود رہنا پڑتا ہو، تو ایسی صورت میں یہ بھی گنجائش ہے کہ ساتھی دو جماعتوں میں تقسیم ہو جائیں، ایک جماعت مسجد میں جاکر جماعت میں شریک ہوجائے، اور ان کی واپسی کے بعد باقی ساتھی اپنی جماعت کرالیں۔
سنتِ مؤکدہ کو بھی بغیر کسی شدید عذر کے نہ چھوڑیں، البتہ ڈیوٹی کے دوران نوافل وغيره نہ پڑھیں، خاص طور پر جب اس میں افسرانِ بالا کی حکم عدولی بھی ہوتی ہو، اور سنن موٴکدہ میں بھی مسنون قراءت پر اکتفا کریں، لمبی قراءت وغیرہ نہ کریں اور جلد از جلد نماز سے فارغ ہوکر واپس ڈیوٹی کی جگہ پہنچنے کی کوشش کریں۔
جہاں تک روڈ پر نماز پڑھنے کا تعلق ہے، تو اس کا حکم یہ ہے کہ روڈ کے کنارے پر جو بھی پاک جگہ میسر ہو، وہاں نماز ادا کی جاسکتی ہے۔