سوال: کسی بھی جنازہ میں چالیس افراد جنازہ پڑھ لیں یا کسی انسان کے جنازہ میں ات صفیں ہوں تو اس میت کے گناہ معاف کردیے جاتے ہیں، اس میں کتنی صداقت ہے اور کیا یہ قرآن و حدیث سے ثابت ہے؟

جواب: واضح رہے کہ نمازِ جنازہ میں کثرت جماعت سے میت کی مغفرت اور جنازہ پڑھنے والوں کی میت کے حق میں سفارش اور دعا کاقبول ہونا احادیث مبارکہ سے ثابت ہے، لہذا کثرتِ جماعت کی وجہ سے مغفرت کی امید کی جاسکتی ہے، البتہ حقوق العباد بغیر ادائیگی اور گناہ کبیرہ بغیر توبہ کے معاف نہیں ہوتے ہیں۔ اس حوالے سے تین قسم کی روایات ملتی ہیں، ذیل میں تینوں روایات کا ترجمہ اور تشریح کے ساتھ ذکر کی جاتی ہیں:
۱۔ حضرت عائشہ رضی اللہ عنہا سے روایت ہے کہ جناب رسول اللہ ﷺ نے ارشادفرمایا: جس میت پر مسلمانوں کی ایک بڑی جماعت نماز پڑھے، جن کی تعداد سو تک پہنچ جائے اور وہ سب اللہ تعالی کے حضور میں اس میت کے لیے سفارش کریں،( یعنی مغفرت و رحمت کی دعا کریں) تو ان کی یہ سفارش اور دعا ضرور قبول ہوگی۔(صحیح مسلم، حدیث نمبر: 947)
۲۔ حضرت ابن عباس رضی اللہ عنہ سے روایت ہے کہ میں نے جناب رسول اللہ ﷺ کو/فرماتے ہوئے سنا کہ جس مسلمان آدمی کا انتقال ہوجائے اور اس کے جنازے کی نماز ایسے چالیس آدمی پڑھیں، جن کی زندگی شرک سے بالکل پاک ہو، ( اور وہ نماز میں اس میت کے لیے مغفرت و رحمت کی دعا اور سفارش کریں ) تو اللہ تعالی ان کی سفارش اس میت کے حق میں ضرور قبول فرماتے ہیں۔(سنن أبی داؤدحدیث نمبر: 3170)
۳۔ حضرت مالک بن ہبیرہ رضی اللہ عنہ سے روایت ہے کہ جناب رسول اللہ ﷺ نے ارشاد فرمایا: جس مسلمان بندے کا انتقال ہوجائے اور مسلمانوں کی تین صفیں اس کی نماز جنازہ پڑھیں، ( اور اس کے لئے مغفرت و جنت کی دعا کریں) تو ضرور اللہ تعالی اس بندے کے واسطے( مغفرت اور جنت) واجب کردیتا ہے۔
(اس حدیث کی روایت کرنے والے حضرت مرثد یزنی کہتے ہیں کہ )مالک بن ہبیرہ رضی اللہ عنہ کا یہ دستور تھا کہ جب وہ جنازہ پڑھنے والوں کی تعداد کم محسوس کرتے، تو اس حدیث کی و جہ سے ان لوگوں کو تین صفوں میں تقسیم کر دیتے تھے۔(سنن أبی داؤد: حدیث نمبر:3166)
تشریح:
۱۔پہلی حدیث میں سو مسلمانوں کے، دوسری میں چالیس مسلمانوں کے اور تیسری میں تین صفوں کے نماز پڑھنے پر ( مردہ کے لیے ) مغفرت و جنت کی سفارش اور دعا کے قبول ہونے کا ذکر ہے۔
محدثین کرام ؒ نے لکھا ہے کہ جناب رسول اللہ ﷺ کو پہلے بتایا گیا کہ سو حضرات کے نماز جنازہ پڑھنے پر مغفرت و جنت کی بشارت ہے، پھر تخفیف کر دی گئی اور چالیس کے عدد پر یہ بشارت سنائی گئی اور بعد میں مزید تخفیف کرکے تین صفوں پر یہی خبردی گئی، اگر چہ تعداد چالیس سے بھی کم ہو۔
۲۔جنازے میں لوگوں کی کثرت سے میت کی مغفرت کی امید کی جاسکتی ہے کہ جتنے لوگ زیادہ ہوں گے تو شفاعت کی امید بھی زیادہ ہوگی۔
۳۔ روایات میں بہت سے اعمال کا ذکر ہے، جو گناہوں سے کفارہ اور معافی کا سبب بنتے ہیں، اس سے مراد "صغیرہ گناہ" ہیں، کیونکہ "کبیرہ گناہ" بغیر توبہ کے معاف نہیں ہوتے ہیں۔
۴۔احادیث مبارکہ اور فقہائے کرام کی عبارات میں تین صفوں کا ثبوت ہے، سات صفوں کا ذکر احادیث مبارکہ میں نہیں ہے، البتہ سات کا عدد چونکہ طاق ہے، اور طاق عدد کی رعایت رکھنا مستحب ہے۔