سوال: السلام علیکم ورحمۃ اللہ!
گزارش عرض ہے کہ مجھے قرآن وسنت کی روشنی میں آپ سے ایک تحریری فتویٰ درکار ہے۔
میرا سوال یہ ہے کہ میں ایک بیوہ خاتون ہوں اور 4اپریل 2021 کو میرے شوہر کا انتقال 68 سال کی عمر میں ہوا ہے اور ان کےوالدین کا انتقال میرے شوہر کی وفات سے کافی سالوں پہلے ہوچکا تھا، اللہ تعالیٰ کے اذن سے ہماری کوئی اولاد بھی نہیں ہے اور میرے مرحوم شوہر اپنے والدین کے اکلوتے بیٹے تھے،لہذا اب میرے علاوہ اپنے شوہر کے ترکہ کا کوئی بھی قانونی وارث نہیں ہے۔
میرے مرحوم شوہر کے نام سے 2 قومی بچت کی اسکیم بہبود سیونگ سرٹیفیکٹ ہیں، جن کی مالیت 27 لاکھ 50 ہزار روپے ہے اور ان سرٹیفیکٹ کے منافع سے ہمارا ماہانہ گھر کا خرچ چلتا ہے۔
اب میں یہ رقم اپنے شوہر کی وفات کے بعد اپنے نام ٹرانسفر کرانا چاہتی ہوں، تاکہ میرا گزارہ اس کے منافع سے ہوسکے۔ بینک کے قوانین کے مطابق مجھے شرعی فتویٰ دیگر ضروری کاغذات کے ساتھ جمع کروانا ہے، تاکہ مطلوبہ ٹرانسفر کی کاروائی عمل میں لائی جاسکے، کیا مندرجہ بالا صورتِ حال میں میں شرعی طور پر ساری رقم اپنے نام ٹرانسفر کرواسکتی ہوں؟ برائے مہربانی تحریری فتویٰ سے رہنمائی فرمائیں، عین نوازش ہوگی۔ جزاک اللہ خیرا، والسلام

جواب: واضح رہے کہ مفتی غیب نہیں جانتا، بلکہ وہ سوال کے مطابق جواب دیتا ہے، سوال کے سچ یا جھوٹ کی ذمہ داری سائل پر ہوتی ہے، غلط بیانی کے ذریعہ اپنے حق میں فتوٰی حاصل کرلینے سے حرام چیز حلال نہیں ہوجاتی، بلکہ حرام معاملہ بدستور حرام ہی رہتا ہے اور غلط بیانی کا مزید وبال اسی پر ہوتا ہے۔
اس وضاحت کے بعد آپ کے سوال کا جواب یہ ہے کہ صورتِ مسئولہ میں اگر واقعتاً بیوی کے علاوہ شوہر کا کوئی اور وارث رشتہ دار موجود نہیں ہے، تو اس کا کل مال بیوی کو دیا جائے گا۔
اصولاً تو اولاد اور باقی رشتے دار نہ ہونے کی صورت میں بیوی کو کل مال کا ایک چوتھائی ملتا ہے، لیکن پوچھی گئی صورت میں چونکہ بیوہ کے علاوہ مرحوم کا کوئی اور وارث موجود نہیں ہے، اس لیے متاخرین فقہاءؒ کے قول کے مطابق باقی مال بھی بیوہ کو ملے گا، اس طرح بیوہ اپنے شوہر کے کل متروکہ مال کی وارث کہلائے گی۔
البتہ سوال میں ذکر کردہ اسکیم میں جمع کردہ اصل رقم کے علاوہ حاصل ہونے والی سودی رقم کو استعمال کرنا شرعا جائز نہیں ہے، لہذا اس سودی رقم کو وصول ہی نہ کیا جائے، اور اگر وصول کر لیا جائے، تو اسے بغیر ثواب کی نیت سے صدقہ کرنا ضروری ہے۔
نوٹ: مکرر واضح ہو کہ اس صورت میں بہت دور کے رشتے دار بھی عصبہ یا ذوی الارحام بن کر وارث ہو سکتے ہیں، اس لیے سب سے پہلے مرحوم کے دیگر ورثاء اور رشتہ داروں کی پوری تحقیق و تفتیش ضروری ہے، کوشش کے باوجود اگر کوئی اور شرعی وارث نہ مل سکے، تو پھر مذکورہ بالا جواب پر عمل کیا جائے گا۔
اس کے باوجود بعد میں کسی زمانہ میں اگر شوہر کا کوئی اور وارث ثابت ہوجاتا ہے، تو وہ مرحوم کی وراثت میں اپنے حصہ کا حقدار ہوگا، اور اس صورت میں بیوہ جو کل مال لے چکی ہو گی، اس کے ذمہ اس وارث کے حصہ کی ادائیگی کرنا لازم ہوگی۔