سوال: کیا کیمرہ مین کی کمائی حلال ہے؟

جواب:
احادیثِ مبارکہ میں جان دار کی تصویر بنانے پر سخت وعیدیں وارد ہوئی ہیں، رسول اللہ صلی اللہ علیہ و سلم کا ارشاد گرامی ہے کہ قیامت کے دن سب سے سخت عذاب تصویر بنانے والوں کو ہوگا۔
چنانچہ کسی پائدار چیز پر جاندار کی تصویر یا نقش بنانا اور بنوانا ناجائز اور حرام ہے، اس لئے جس کیمرہ مین یا فوٹو گرافر کے کام میں جاندار کی ایسی تصویر بنائی جاتی ہو، تو ایسے کام کو ذریعہ معاش اور پیشہ بنانا بھی جائز نہیں ہے، اور ایسی تصاویر بنانے کے عوض حاصل ہونے والی کمائی بھی حلال نہیں ہے۔
البتہ ضرورتِ شدیدہ کے موقع پر مثلًا: پاسپورٹ یا شناختی کارڈ وغیرہ کی غرض سے تصویر بنوانے کی اجازت دی گئی ہے، اس لئے مجبوری میں جاندار کی تصویر بنانے اور بنوانے والے پر گناہ نہیں ہوگا، لیکن اس کا پیشہ بنانا پھر بھی درست نہیں ہے۔
واضح رہے کہ جاندار کی ڈیجیٹل تصویر کا جب تک کسی پائیدار چیز پر عکس یا پرنٹ وغیرہ نہ لیا جائے، تو ایسی تصویر بہت سے علماء کرام کے نزدیک حرام تصویر کے حکم میں داخل نہیں ہے، اس اعتبار سے اس کام کے عوض حاصل ہونے والی کمائی بھی حرام نہیں کہلائے گی، بشرطیکہ اس میں خواتین یا حرام مناظر کی تصاویر اور ویڈیوز نہ ہوں، اس کے باوجود بلا ضرورت ڈیجیٹل تصاویر بنانے اور اس کا پیشہ اختیار کرنے سے بھی اجتناب کرنا چاہیے۔