سوال: وہ کون سے موزے ہیں جن پر مسح کیا جا سکتا ہے؟

جواب: واضح رہے کہ ایسے موزے جو پورے چمڑے کے ہوں، جن کو "خفین" کہاجاتا ہے، یا ان کے اوپر اور نچلے حصے میں دونوں طرف چمڑا چڑھا ہوا ہو، جن کو "مجلدین "کہا جاتا ہے، یا صرف نچلے حصے میں چمڑا چڑھا ہوا ہو، جن کو "منعلین "کہا جاتا ہے، ان تین قسموں (خفین، مجلدین اور منعلین) پر بالاتفاق مسح کرنا جائز ہے۔
اگر وہ موزے چمڑے کے نہ ہوں، بلکہ کسی موٹے کپڑے یا ریگزین وغیرہ کے ایسے موزے ہوں جو باندھے بغیر ٹخنوں پر کھڑے رہیں اور ان کو پہن کر جوتوں کے بغیرکم از کم تین میل (چار کلو میٹر اور آٹھ سو تیس میٹر)چل سکیں، اور اس میں ٹخنوں تک پاؤں چھپے رہیں، نیز وہ پانی کو جذب کرنے والے نہ ہوں، یعنی اگر ان پر پانی ڈالا جائے تو ان کی نچلی سطح تک پانی نہ پہنچے تو ایسے موزوں پر بھی مسح کرنا جائز ہے، البتہ وہ باریک موزے جو آج کل لوگ عموماً پہنتے ہیں، جیسے: سوتی، اونی اور نائیلون وغیرہ کے موزے، ان کے بارے میں اجماع امت ہے کہ ان پر مسح کرنا جائز نہیں ہے۔