سوال: ۱) کیا یہ بات صحیح ہے کہ روضہ اطہر پر پڑھا جانے والا درود و سلام حضور ﷺ خود سنتے ہیں اور دور سے پڑھے جانے والا درود و سلام فرشتے آپ ﷺ تک پہنچاتے ہیں؟
۲) روضہ رسول پر حاضری کے وقت شفاعت کا طلب کرنا کیسا ہے؟
۳) حج و عمرہ کی ادائیگی کے لیے جانے والے حضرات کو یہ کہنا کہ روضہ رسول پہ حاضری کے وقت بارگاہ رسالت میں میرا نام لیکر درود و سلام عرض کرتے ہوئے شفاعت کی درخواست کرنا، کیا یہ صحیح ہے؟

جواب: ۱) اہل سنت والجماعت کا عقیدہ ہے کہ جناب رسول اللہ ﷺ اپنی قبر مبارک میں حیات ہیں اور آپ ﷺ کی قبر مبارک کے قریب پڑھا گیا درود و سلام آپ ﷺخود سنتے ہیں اور دور سے پڑھا گیا درود و سلام آپ ﷺ تک فرشتوں کے ذریعے پہنچایا جاتا ہے، اس عقیدہ سے متعلق ذیل میں چند احادیث مبارکہ درج کی جاتی ہیں:
الف)حضرت ابوہریرہ ؓ سے مروی ہے کہ رسول اللہ ﷺ نے فرمایا: اپنے گھروں کو قبرستان مت بناؤ اور نہ میری قبر کو عید (میلہ گاہ) بناؤ اور مجھ پر درود پڑھو، تم جہاں کہیں بھی ہو گے تمہارا درود مجھ کو پہنچ جائے گا۔(سنن أبی داؤد، حدیث نمبر:2042)
ب)حضرت عبداﷲ بن مسعود رضی اﷲ عنہ سے روایت ہے کہ جناب رسول اللہ ﷺ نے ارشاد فرمایا: بے شک زمین میں اﷲ تعالیٰ کی جانب سے ایسے فرشتے مقرر ہیں، جو مجھے میری امت کا سلام پہنچاتے ہیں۔(مسند امام احمد،حدیث نمبر:4320)
ج)حضرت ابوہریرہ رضی اللہ عنہ سے روایت ہے کہ جناب رسول اللہ ﷺ نے ارشاد فرمایا:جو شخص میری قبر کے پاس مجھ پر درود پڑھتا ہے، میں اس کو سنتا ہوں، اور جو شخص دور سے مجھ پر درود بھیجتا ہے، وہ میرے پاس پہنچا دیا جاتا ہے۔(شعب الایمان للبیھقی ،حدیث نمبر:1482)
ان احادیث سے معلوم ہوتا ہے کہ آپ ﷺ کی قبر مبارک کی قریب پڑھا گیا درود شریف آپ ﷺ براہ راست خود سنتے ہیں اور دور سے پڑھا گیا درود شریف آپ ﷺ تک فرشتوں کے واسطے سے پہنچایا جاتا ہے۔
۲) جى ہاں ! روضہ اقدس کے سامنے ہاتھ اٹھائے بغیر آنحضرت ﷺ کى خدمتِ اقدس میں شفاعت کى درخواست کرنا اپنے لیے بھى جائز ہے اور دوسرے امتیوں کے لیے بھى جائز ہے۔
۳) روضہ اقدس پر حاضری کے وقت جیسے خود سلام پیش کرنا درست ہے، اسی طرح دوسروں کی طرف سے بھی سلام پیش کرنا درست ہے، جس کا طریقہ یہ ہے کہ اس طرح کہیں: "یارسول اللہ ! آپ پر ایمان رکھنے والے اور آپ کا نام لینے والے چند عزیزوں نے سلام عرض کیا ہے، آپ ان کا سلام قبول فرمائیں اور ان کے لیے بھی اپنے رب سے مغفرت مانگیں، وہ بھی آپ کی شفاعت کے طلب گار اور امیدوار ہیں۔
عربی میں سلام پیش کرنا ہو تو ان الفاظ میں سلام پیش کرے: اَلسَّلاَمُ عَلَیْکَ یَا رَسُوْلَ اللّٰه ! فُلاَنُ بْنُ فُلاَنٍ یُسَلِّمُ عَلَیْکَ یَا رَسُوْلَ اللّٰہِ.(فلاں بن فلاں کی جگہ پر سلام بھیجنے والے مرد یا عورت کا نام لیا جائے۔)