سوال: مفتی صاحب! اس حدیث کی تصدیق فرمادیں: جو شخص وضو کے وقت یہ دعا (سبحانک اللھم و بحمدک لاالہ الا انت استغفرک واتوب الیک) پڑھ لے، اس کی مغفرت کا پرچہ لکھ کر مہر لگا کر رکھ دیا جاتا ہے، قیامت تک اس کی مہر نہ توڑی جائے گی اور بخشش کا حکم برقرار رہے گا۔ (طبرانی اوسط، 123/2)

جواب: سوال میں ذکر کردہ حدیث ’’صحیح ‘‘ہے، اس کو بیان کیا جاسکتا ہے۔
ذیل میں اس روایت کا ترجمہ ،تخریج ،اسنادی حیثیت مندرجہ ذیل ہے:
ترجمہ :حضرت ابوسعید خدری رضی اللہ عنہ سے روایت ہے کہ جناب رسول اللہ ﷺ نے ارشاد فرمایا: جس نے سورۂ کہف کی تلاوت کی، اس کے لیے قیامت کے دن اس کی جگہ سے لے کر مکہ تک نور ہوگا اور جس نے اس کی آخری دس آیات تلاوت کی، اور دجال کا خروج ہوا تو اس کو نقصان نہیں پہنچا سکے گا، اور جس نے وضو کیا اور یہ دعا پڑھی " سبحانك اللهم وبحمدك، لا إله إلا أنت، أستغفرك وأتوب إليك " "اے اللہ ! تو پاک ہے اپنی تعریفوں کے ساتھ، میں گواہی دیتا ہوں کہ تو ہی معبود برحق ہے، میں تجھ سے بخشش طلب کرتا ہوں اور تیری طرف رجوع کرتا ہوں،" تو ان کلمات کو ایک کاغذ میں لکھ کر اس پر مہر لگا دی جاتی ہے، اسے قیامت کے دن تک نہیں توڑا جاسکتا ہے۔(المعجم الاوسط: حدیث نمبر:1455)
تخریج الحدیث :
۱۔اس روایت کو امام طبرانی (م 360ھ) نے’’ المعجم الاوسط‘‘(2/123)، رقم الحدیث: 1455، ط: دار الحرمین) میں بیان کیا ہے۔
۲۔امام ابن ابی شیبہ (م 235ھ)نے’’ مصنف ابن أبي شيبة‘‘(1/231)،رقم الحدیث:19،ط: دار القبلة )میں ذکر کیا ہے۔
۲۔امام نسائی (م 303 ھ)’’السنن الکبری‘‘(9/37)،رقم الحدیث: 9829،9831،ط: مؤسسة الرسالة)میں ذکر کیا ہے۔
۳۔ امام ابن السُّنِّي (م 364ھ) نے’’ عمل اليوم والليلة‘‘ (35)رقم الحدیث: 30،ط: دار ارقم )میں ذکر کیا ہے۔
۴۔امام حاکم (م405 ھ)نے ’’المستدرک‘‘ (1/752) ،رقم الحدیث:2072،ط:دارالکتب العلمیۃ)میں ذکر کیا ہے۔
مذکورہ روایت کی اسنادی حیثیت:
واضح رہے کہ روايت مرفوع اور موقوف دونوں طرح مروی ہے ۔امام نسائی(م303ھ) نے موقوف روایت کو درست قراردیا ۔(2)
امام حاکم (م405 ھ)نے اس روایت کو نقل کرنے بعد فرمایا:یہ حدیث صحیح ہے اورمسلم کی شرط کے مطابق ہے لیکن امام بخاری اور امام مسلم نے اس کو نقل نہیں کیا ہے۔
علامہ منذری (م 656 ھ) نے بھی اس روایت کو’’صحیح ‘‘کہا ہے۔
علامہ بوصیری(م 840ھ)اور علامہ ہیثمی (م807ھ)نے اس روایت کونقل کرکے فرمایاکہ امام طبرانی نے اس کو روایت کیا ہے اور اس کے رجال صحیح (روایت)کے رجال ہیں۔
علامہ ابن حجر عسقلانی (م 852ھ) نے تفصیلاً کلام نقل کرنے بعد فرمایاامام نووی (م 676 ھ) نے کہا ہے کہ امام نسائی (م 303 ھ)نے اس روایت کومرفوعاً اور موقوفاً دونوں طرح روایت کیا ہےاور دونوں کی سند ضعیف ہے، لیکن موقوف روایت کی صحت میں کوئی شک نہیں ہے۔اس کے روات صحیحین کے روات ہے اس کو ضعیف قراردینے کی وجہ نہیں ہے۔(۳)لہذا اس تفصیل سے معلوم ہوا کہ مذکورہ بلا روایت ’’صحیح ‘‘ ہے اس کوبیان کیا جاسکتا ہے۔