سوال: مفتی صاحب ! براہ کرم اس واقعہ کی تصدیق فرمادیں: حضرت ابو بکر صدیق رضی اللہ عنہ کے واقعہ کے بارے میں ہے کہ انہوں نے ظہر وعصر ومغرب میں نماز کے بعد حضور سے ملاقات نہیں کی تو حضور ﷺ نے انہیں بلا کر نہ ملنے کی وجہ پوچھی تو آپ نے عرض کیا : آپ نے خود ہی فرمایا کہ (زُرْ غِبًّا تَزْدَدْ حُبًّا وقفے سے ملا کرو محبت بڑھے گی)۔

جواب:
ذکر کردہ کلمات "زر غبا تزدد حبا" (ملاقات میں ناغہ کیا کرو، اس سے تمہاری جانب سے محبت میں مزید اضافہ ہوگا) کتب حدیث میں متعدد صحابہ کرام رضی اللہ عنہم سے منقول ہیں، تاہم سوال میں حضرت صدیق اکبر رضی اللہ عنہ سے متعلق جس واقعے کا ذکر ہے، یہ واقعہ تلاش کے بعد کسی مستند کتاب میں نہیں ملا ہے، لہذا جب تک کسی معتبر ومستند کتاب سے حوالہ نہ مل جائے، اس وقت تک واقعہ کو آگے نقل کرنے سے احتراز ضروری ہے۔
آنحضرت ﷺ نے کم و بیش نو (9) صحابہ رضی اللہ عنہم کو یہ کلمات ارشاد فرمائے، تاہم ان روایات کی سند ضعفاء ومجاہیل (ناقلین) سے خالی نہیں ہے، جیسا کہ مسند بزّار میں روایت ہے کہ رسول اللہ صلی اللہ علیہ وسلم نے حضرت ابو ذر غفاری رضی اللہ عنہ سے ارشاد فرمایا: "ملاقات میں ہمیشگی اختیار مت کیا کرو، بلکہ ناغہ کیا کرو، اس سے تمہارے دل میں محبت بڑھے گی"۔ ذیل میں ان صحابہ کرام رضی اللہ عنہم کے اسماء گرامی باحوالہ ملاحظہ کیجئے:
1- حضرت حبیب بن مسلمہ رضی اللّٰہ عنہ(المعجم الاوسط للطبرانی، من اسمه:أزهر، 248/3، رقم الحدیث: 3052، الناشر: دار الحرمين – القاهرة)
2- حضرت ابو ذر غفاری رضی اللّٰہ عنہ(مسند البزار، عن عبدالله بن الصامت عن أبي زر الغفاري، 380/9،الناشر: مكتبة العلوم والحكم - المدينة المنورة)
3- حضرت ابو ہریرہ رضی اللّٰہ عنہ(المعجم الاوسط للطبرانی، من اسمه:أحمد، 210/2، رقم الحدیث: 1754، الناشر: دار الحرمين – القاهرة)
4- حضرت عبد اللہ بن عمر رضی اللّٰہ عنہما(المعجم الکبیر للطبرانی، أبو قبیل عن عبداللہ بن عمرو بن العاص، 70/13، رقم الحدیث:173، دار النشر: مكتبة ابن تيمية – القاهرة)
5- حضرت عبداللہ بن عمرو بن العاص رضی اللّٰہ عنہما(المعجم الاوسط للطبرانی، أبو قبیل، عبدالله بن عمرو بن العاص، 70/13، رقم الحدیث: 173، الناشر: دار الحرمين – القاهرة)
6- حضرت علی بن أبی طالب رضی اللّٰہ عنہ(الإخوان لابن أبي الدنیا، باب في إغباب الزیارة، 156/1، رقم الحدیث:104، الناشر: دار الكتب العلمية – بيروت)
7- حضرت معاویۃ بن حیدۃ رضی اللّٰہ عنہ(فوائد تمام، لأبی قاسم تمام بن محمد القاسم الرازي، 44/4، رقم الحدیث:1093، ال)محقق: حمدي عبد المجيد السلفي، الناشر: مكتبة الرشد – الرياض)
8- حضرت جابر بن عبداللہ رضی اللّٰہ عنہما(تاریخ اصبهان، لأبي نعیم الأصبهاني، 179/1، المحقق: سيد كسروي حسن، الناشر: دار الكتب العلمية - بيروت)
9- أم المؤمنین حضرت عائشہ صدیقہ رضی اللّٰہ عنہا(تاریخ بغداد، لأبي أحمد بن علی الخطیب البغدادي، حرف الواو، 429/11، الناشر: دار الغرب الإسلامي – بيروت)
روایت کی مختصر تشریح:
مذکورہ کلمات کے حوالہ سے ابن حبان رحمہ اللہ نے زبردست اصول کی جانب رہنمائی کی ہے، جس کا حاصل یہ ہے " دراصل ملاقات کے معاملے میں دو طرح کے لوگ ہوتے ہیں:
(1) جن سے انسان کا برادرانہ تعلق ہو، آپس میں اخلاص ومحبت کا رشتہ قائم ہو، اس طور پر کہ بار بار ملاقات سے اکتاہٹ پیدا ہونے کے بجائے ایک دوسرے سے انسیت پیدا ہوتی ہو، سو ایسے دوست سے روابط وتعلق کی کثرت باعث خیر ہے۔
(2) جس دوست سے محبت گہری نہ ہو، بلکہ تکلّفات کا حجاب حائل ہو، دل میں منافقت وکھٹک ہو، سو ایسی دوستی اکثر وبیشتر ملاقات کی کثرت سے اکتاہٹ پیدا کرتی ہے، ایسے میں سمجھداری کا مظاہرہ کرکے علیحدگی اختیار کرنے اور بوقتِ ضرورت ملاقات انسان کی عزت کو بحال رکھتی ہے۔ (روضة العقلاء ونزھة الفضلاء)