سوال: السلام علیکم، مفتی صاحب ! میں سافٹ ویئر ڈیویلپر ہوں اور فری لانسنگ کا کام کرتا ہوں، ایک پراجیکٹ آیا ہے، وہ یہ ہے کہ ایک ویب سائٹ بنانی ہے، جس میں وہ گانے اپلوڈ کرے گا۔ پوچھنا یہ تھا کہ ایسی ویب سائٹ بنا کر پیسے کمانا جائز ہے؟
جزاک اللہ

جواب: واضح رہے کہ ایسی ویب سائٹ بنانا جو ناجائز کاموں کے ساتھ خاص نہ ہو، بلکہ اس کا جائز استعمال بھی ممکن ہو، (یعنی گانوں کے علاوہ اس میں جائز مواد جیسے: نعتیں وغیرہ بھی اپلوڈ کی جاسکتی ہوں) اور ویب سائٹ بنانے والے کی طرف سے ناجائز کاموں میں معاونت مقصود نہ ہو، تو ایسی ویب سائٹ بناکر دینے کی گنجائش ہے، اس کو ناجائز کاموں میں استعمال کرنے کی صورت میں استعمال کرنے والے کو اس کا گناہ ہوگا۔
لیکن اگر معاملہ کرتے وقت کسٹمر نے ناجائز مقصد کیلئے بنوانے کی صراحت کردی ہو، (جیسا کہ سوال میں مذکور ہے) تو ایسی صورت میں یہ بات معلوم ہونے کے باوجود اسے ویب سائٹ بناکر دینا گناہ کے کام میں معاونت کرنا (تعاون علی الاثم) ہے، اور گناہ کے کاموں میں معاونت کرنا ناجائز اور گناہ ہے، لہذا اس سے اجتناب لازم ہے۔