سوال: السلام علیکم، مفتی صاحب! میرے بھائی بچپن سے مصوری کے پیشے سے وابستہ ہیں اور ان کا ذریعہ معاش بھی یہ ہی ہے، تین سال پہلے میرے والدین کی وفات ہوگئی، میرے والدین نمازی اور پرہیزگار تھے، پنچ وقتہ نمازوں اور قرآن پابندی سے پڑھتے تھے، والدہ بچوں کو فی سبیل اللہ قرآن پڑھایا کرتی تھیں، بھائی نے انکے مرنے کے بعد ترکہ بھی کسی کو نہیں دیا، نہ ہم لوگوں نے اصرار کیا، کیونکہ بھائی کا کہنا یہ ہے کہ گھر بکنے کے بعد وہ اپنا گھر اس قیمت میں نہیں لے سکیں گے، و الدین کی وفات کے بعد بھائی نے گانے گانے بھی شروع کردیے۔
میں نے اپنے والد کو دو تین دفعہ خواب میں بخار میں مبتلا، ان کی آنکھوں کو دکھتا ہوا اور بہت کمزور دیکھا ہے، مجھے پوچھنا یہ ہے کہ باشعور اولاد کا یہ عمل انکے لیے نقصان کا باعث ہے اور کیا ماں باپ بھی بچوں کے ناجائز کاموں کے ذمہ دار ہوں گے، جبکہ زندگی میں ہی وہ اولاد نافرمان اور پریشان کرنے والی تھی؟
ویسے تو میں روزانہ والدین کی مغفرت کے لیے دعائیں اور درود پاک پڑھ کر بخشتی ہوں، اگر کوئی اور طریقہ ان کے ایصال ثواب کا ہو، تو وہ بھی بتا دیجیئے گا۔ جزاک اللّہ خیراً

جواب: ایصال ثواب کا بہتر طریقہ یہ ہے کہ جتنی توفیق ہو سکے، قرآن کریم پڑھ کر یا مخفی طور پر کچھ صدقہ و خیرات کر کے یا اور کوئی نفلی عمل کرکے اس کا ثواب مرحوم کو بخش دیا جائے۔
نیز باشعور اولاد کا ناجائز عمل ماں باپ کے لیے عذاب کا باعث نہیں ہے، بشرطیکہ ماں باپ نے اولاد کی تربیت کی کوشش کی ہو، اور وہ اپنی زندگی میں ان اعمال پر راضی نہ ہوں۔