سوال: میری ایک ویب سائٹ ہے، جس کے اوپر میں دوسرے لوگوں کے بنائے ہوئے کارٹون اپلوڈ کر تا ہوں، اس سے حاصل ہونے والی آمدنی حلال ہے یا نہیں؟ رہنمائی فرمادیں۔

جواب: اگر یہ کارٹون موسیقی یا فحاشی وغیرہ پر مشتمل ہوں، تو انہیں بنانا، اپلوڈ کرنا، دیکھنا اور سننا سب ناجائز اور حرام ہے، اسی طرح کسی اور کے بنائے ہوئے کارٹون اصل مالکان کی اجازت کے بغیر اپلوڈ (upload) کیے جائیں، تو بھی ایسا کرنا ناجائز ہے، جس سے اجتناب کرنا ضروری ہے، اور ایسی صورت میں اس سے پیسے کمانا بھی حلال نہیں ہے، اور اگر رقم وصول کرچکے ہوں، وہ بلانیتِ ثواب صدقہ کردیں۔
تاہم اگر وہ کارٹون اصل مالک کی اجازت سے اپلوڈ (upload) کیے جائیں، نیز ان میں فحاشی اور موسیقی وغیرہ نہ ہو، بلکہ بچوں کے لیے اچھی نیت سے اسلامی انداز میں بنائے گئے کارٹون ہوں، تو ان سے پیسے کمانے کی گنجائش ہے۔
تاہم ایسی صورت میں بھی کوشش کرنا چاہیے کہ ان میں جاندار کی تصاویر نہ ہوں، بلکہ صرف غیر جاندار چیزوں پر مشتمل ہوں، کیوںکہ جاندار کی ڈیجیٹل تصویر کے حرام اور حلال ہونے میں علمائے کرام کا اختلاف ہے، اس لیے بہتر اور احتیاط یہی ہے کہ بلا ضرورت جاندار کی ڈیجیٹل تصاویر بنانے اور دیکھنے سے اجتناب کیا جائے۔