سوال: حضرت ابوہریرہ رضی اللہ تعالی عنہ بیان کرتے ہیں کہ میں نے رسول اکرم ﷺ کو یہ فرماتے ہوئے سنا: "میری ساری امت کو معاف کیا جائے گا، سوائے گناہوں کو اعلانیہ اور کھلم کھلا کرنے والوں کے اور یہ بھی اعلانیہ گناہ ہے کہ ایک شخص رات کو کوئی (گناہ کا) کام کرے، حالانکہ اللہ تعالی نے اس کے گناہ کو چھپا دیا ہے، مگر صبح ہونے پر وہ کہنے لگے کہ اے فلاں! میں نے کل رات فلاں فلاں برا کام کیا تھا، رات گزر گئی تھی اور اس کے رب نے اس کا گناہ چھپائے رکھا، لیکن جب صبح ہوئی تو وہ خود اللہ کے پردے کو کھولنے لگا"۔
میں نے سنا ہے کہ اگر انسان آسمان و زمین کو گناہوں سے بھر دے اور سچے دل سے توبہ کرلے تو اللہ معاف کر دیتا ہے۔
میرا ایک دوست ہے جو 18 سال کی عمر میں ایک لڑکی سے زنا کا مرتکب ہو گیا تھا، لیکن جب اُسے گناہ کا پتا چلا تو وہ بہت بے چین، پریشان اور گھبرایا ہوا تھا، اُس نے سچے دل سے رو رو کر گڑگڑا کر توبہ کی اور اب سب ہی گناہوں سے دور رہتا ہے، لیکن اُس سے یہ غلطی ہُوئی کہ اُس نے اللہ کے رکھے ہوئے پردہ کو ہٹادیا اور اپنے کیے ہوئے گناہ کے بارے میں مجھے بتادیا۔
جب سے یہ حدیث سنی ہے، میرا دوست تب سے مایوسی اور نا اُمیدی میں ڈوب گیا ہے، نہ کھانا کھاتا ہے اور نہ ہی کچھ کام کرتا ہے، آپ رہنمائی فرمادیجئے کہ کیا میرے دوست کے لیے معافی کی گنجائش ہے، کیا اُس کی توبہ قبول ہوگی؟

جواب: اللہ تعالى کى رحمت وسیع ہے، اس سے مایوس نہیں ہونا چاہیے، اللہ تعالى کفر وشرک کے علاوہ تمام گناہوں کو معاف فرما دیتے ہیں، ارشاد باری تعالیٰ ہے: "بیشک اللہ اس بات کو معاف نہیں کرتا کہ اس کے ساتھ کسی کو شریک ٹھہرایا جائے، اور اس سے کمتر ہر بات کو جس کے لیے چاہتا ہے معاف کر دیتا ہے۔(سورۃ النساء: آیت نمبر: 48)
"کہہ دو کہ اے میرے وہ بندو! جنہوں نے اپنی جانوں پر زیادتی کر رکھی ہے، اللہ کی رحمت سے مایوس نہ ہو۔ یقین جانو اللہ سارے کے سارے گناہ معاف کردیتا ہے۔ یقینا وہ بہت بخشنے والا بڑا مہربان ہے۔(سورۃ الزمر،آیت نمبر:53)
تفسیر: یعنی اگر کسی شخص نے ساری زندگی کفر، شرک یا گناہوں میں گزاری ہے تو وہ یہ نہ سمجھے کہ اب اس کی توبہ قبول نہیں ہوگی، بلکہ اللہ تعالیٰ کی رحمت ایسی ہے کہ مرنے سے پہلے پہلے جس وقت بھی انسان اپنی اصلاح کا پختہ ارادہ کرکے اللہ تعالیٰ سے اپنی پچھلی زندگی کی معافی مانگے اور توبہ کرلے تو اللہ تعالیٰ اس کے تمام گناہوں کو معاف فرمادے گا۔(آسان ترجمہ قرآن)
مذکورہ بالا تفصیل سے معلوم ہوا کہ شرک کے علاوہ تمام گناہ، چاہے وہ خفیہ ہوں یا اعلانیہ ہوں، بشرطیکہ ان گناہوں سے سچى توبہ کى جائے تو وہ قابل معافی ہیں اور شرک سے بھی اگر سچی توبہ کر لی جائے، یعنی اسلام قبول کر کے توحید باری تعالیٰ کا اقرار کر لیا جائے تو وہ بھی معاف ہو جائے گا۔
باقی جہاں تک سوال میں بیان کی گئی حدیث کا تعلق ہے تو اس حدیث کی تشریح میں محدثین نے یہ بات بیان فرمائی ہے کہ جس شخص پر اللہ تعالى نے اپنا پردہ رکھا ہو، وہ اگر سر عام اپنے گناہ کا تذکرہ کرے تو وہ گویا بطورِ فخر اور سرکشى اس کو بیان کر رہا ہے جو ایک طرف کھلم کھلا اللہ تعالیٰ سے بغاوت ہے اور دوسری طرف احکام شریعت کا مذاق اڑانا اور ان کی توہین کرنے کے مترادف ہے، عام طور پر ایسے سرکش کو توبہ کى توفیق نہیں ہوتى، اس لیے جب وہ اس گناہ سے توبہ ہی نہیں کرتا تو اس کى معافى نہیں ہوگی، لیکن اگر کوئى شخص اپنی اس حرکت پر دل سے پشیمان اور شرمندہ ہو اور وہ خوب گڑگڑا کر اللہ تعالى سے توبہ واستغفار کرے تو چونکہ وہ سرکشی اختیار نہیں کر رہا ہے، اس لیے اس کے اس گناہ پر کی گئی توبہ سے معافی ہو جائے گی۔ جیسا کہ حدیث مبارک میں ہے: "گناہ سے توبہ کرنے والا ایسا ہے، گویا اس نے کوئى گناہ کیا ہى نہیں ہے"۔ (سنن ابن ماجہ: حدیث نمبر: 4250)