سوال: ایک رات حضرت عمر بن خطاب رضی اللہ عنہ اپنے عہد خلافت میں لوگوں کے حالات کا جائزہ لے رہے تھے اور ان کی خبرگیری میں مصروف تھے کہ آپ رضی اللہ عنہ اسی دوران کیا سنتے ہیں کہ ایک عورت اپنی بیٹی سے کہہ رہی ہے کہ بیٹی! جاؤ اٹھو اور دودھ میں پانی ملا دو۔ بیٹی نے کہا اماں! کیا آپ کو معلوم نہیں کہ امیرالمومنین حضرت عمربن الخطاب رضی اللہ عنہ نے اس سے منع کیا ہے۔ اس کی ماں نے کہا اے بیٹی!جاؤ تم دودھ میں پانی ملا دو، عمر رضی اللہ عنہ تو ہمیں نہیں دیکھ رہا ہے۔ اس لڑکی نے جواب دیا کہ اماں! اگر عمر رضی اللہ عنہ ہمیں نہیں دیکھ رہا تو عمر رضی اللہ عنہ کا رب تو ہمیں دیکھ رہا ہے۔ حضرت عمر رضی اللہ عنہ کو اس نیک لڑکی کی بات بہت پسند آئی پھر بعد میں حضرت عمر رضی اللہ عنہ نے اپنے بیٹے کی شادی اس لڑکی سے کردی۔ مفتی صاحب ! یہ واقعہ کس حد تک درست ہے؟

جواب: سوال میں ذکرکردہ قصہ صحیح ہے، اس کوبیان کیاجاسکتا ہے۔
ترجمہ:حضرت عمر رضی اللہ عنہ نے اپنے دور خلافت میں دودھ میں پانی ملانے سے منع کیاتھا، ایک رات مدینہ کی گلیوں کا گشت کررہے تھے، اچانک آپ نے سنا کہ ایک عورت اپنی بیٹی سے کہہ رہی ہے : ’’بیٹی !تم نے اب تک دودھ میں پانی نہیں ملایا، صبح ہونے کو ہے ۔‘‘ بیٹی جواب میں بولی:’’ماں! میں پانی کیسے ملاؤں؟ امیر المومنین نے دودھ میں پانی ملانے سے منع کیا ہے۔‘‘اس پر ماں نے کہا: بیٹی ! اور لوگ بھی تو ملاتے ہیں، تم بھی ملالو، امیرالمومنین کو کیا خبر؟ بیٹی بولی:’’اگر عمر کو خبر نہیں تو عمر کا رب جانتا ہے۔ میں یہ کام نہیں کروں گی، حضرت عمر نے اس سے منع کیا ہے۔‘‘ حضرت عمر رضی اللہ عنہ کو یہ گفتگو بےحد پسند آئی، جب صبح ہوئی تو اپنے صاحبزادے عاصم کو بلایا اور قصہ سنا کر فرمایا کہ فلاں جگہ جاکر معلوم کرو کہ یہ لڑکی کون ہے؟ حضرت عاصم نے تحقیق کی تو معلوم ہوا کہ اس لڑکی کا تعلق قبیلہ بنو ہلال سے ہے، حضرت عمر رضی اللہ عنہ کو اطلاع دی، تو آپ نے حضرت عاصم کو فرمایا: اس لڑکی سے نکاح کر لو، وہ یقیناً اس لائق ہے کہ اس کے بطن سے ایک شہ سوار پیدا ہو، جو تمام عرب کی قیادت کرے، چنانچہ حضرت عاصم نے اس لڑکی سے نکاح کرلیا، اس کے بطن سے ایک لڑکی ام عاصم بنت عاصم بن عمر پیدا ہوئی، جس کا نکاح عبدالعزیز بن مروان بن حکم سے ہوا، اور ان سے حضرت عمر بن عبدالعزیز رحمہ اللہ پیدا ہوئے۔(سيرة عمر بن عبد العزيز لعبد الله بن عبد الحكم، ص:24 ،ط:عالم الكتب)
ماخذ القصۃ:
۱۔امام عبد الله بن عبد الحكم(م214ھ)’’سيرة عمر بن عبدالعزيز‘‘(24،ط:عالم الكتب ) میں ذکر کیا ہے۔
۲۔علامہ ابوبکر الاجری(م360ھ)نے ’’ أخبار أبي حفص عمر بن عبد العزيز‘‘(48)،ط: مؤسسة الرسالة)میں ذکر کیا ہے۔
۳۔علامہ ابن عساکر (م 571ھ)نے’’ تاریخ دمشق‘‘ (70/252) ، ط: دار الفكر)میں بیان کیا ہے۔
نوٹ:ام عاصم کا نام علامہ ابن حبان ؒ نے ’’لیلی‘‘ (۲)اور ابن عساکر نے’’عتبہ‘‘ ذکر کیا ہے۔