سوال: رسول اللہ ﷺ نے فرمایا: اللہ تعالیٰ کا جلال جو تم ذکر کرتے ہو، وہ تسبیح (سبحان اللہ)، تہلیل (لا اله الا الله) اور تحمید (الحمد للہ) ہے، یہ کلمے عرش کے ارد گرد گھومتے رہتے ہیں، ان میں شہد کی مکھیوں کی بھنبھناہٹ کی طرح آواز ہوتی ہے، اپنے کہنے والے (اللہ کے سامنے) کا ذکر کرتے ہیں، کیا تم میں سے کوئی یہ پسند نہیں کرتا کہ اس کے لیے ایک ایسا شخص ہو، جو اللہ تعالیٰ کے سامنے اس کا برابر ذکر کرتا رہے۔ (سنن ابن ماجہ:3809) کیا یہ تسبیحات کہیں سے ثابت ہے؟

جواب: سوال میں ذکرکردہ روایت کی سند’’صحیح‘‘ ہے، لہذا اس کو بیان کیا جاسکتا ہے، اس روایت کا ترجمہ ،تخریج ،اسنادی حیثیت اور مختصر تشریح مندرجہ ذیل ہے:
ترجمہ:حضرت نعمان بن بشیر رضی اللہ عنہ سے روایت ہے کہ جناب رسول اللہ ﷺ نے فرمایا: ”اللہ تعالیٰ کا جلال جو تم ذکر کرتے ہو، وہ تسبیح (سبحان الله) تہلیل (لا إله إلا الله) اور تحمید (الحمد لله) ہے، یہ کلمے عرش کے ارد گرد گھومتے رہتے ہیں، ان میں شہد کی مکھیوں کی بھنبھناہٹ کی طرح آواز ہوتی ہے، اپنے کہنے والے کا ذکر کرتے ہیں (اللہ کے سامنے) کیا تم میں سے کوئی یہ پسند نہیں کرتا کہ اس کے لیے ایک ایسا شخص ہو، جو اللہ تعالیٰ کے سامنے اس کا برابر ذکر کرتا رہے“۔(سنن ابن ماجہ، حدیث نمبر: 3809)
تخریج الحدیث:
1۔اس روایت کو امام ابن ماجہ (م 273ھ)نے’’سنن ابن ماجہ‘‘(4 / 716) رقم الحدیث: 3809،ط: دار الرسالة العالمية)میں ذکر کیا ہے۔
2۔ حافظ ابن أبي شيبہ( م 235ھ)نے ’’مصنف ابن ابی شیبہ " (15 / 218) رقم الحدیث :30028،ط:دارالقبلہ) میں نقل کیا ہے۔
۳۔امام احمد بن حنبل(م 241ھ) نے ’’مسند احمد‘‘(30 / 312) ،رقم الحدیث:18362،ط:مؤسسۃ الرسالہ )میں نقل کیا ہے۔
مذکورہ روایت کی اسنادی حیثیت:
امام حاکم ؒ(م405ھ) نے اس حدیث کو ’’امام مسلم کی شرط کے مطابق قرار دیا اور علامہ بوصیریؒ(م 840ھ) نے فرمایا:یہ حدیث صحیح الاسناد ہے اور اس کے رجال ثقہ ہیں۔
تشریح:
اس حدیث مبارکہ میں جن کلمات تسبیح (سبحان الله) تہلیل (لا إله إلا الله) اور تحمید (الحمد لله) کی فضیلت کا ذکر ہے، ان کلمات کے پڑھنے کی فضیلت اور بھی بہت سی صحیح روایات میں بیان کی گئی ہے۔
مسلم شریف (حدیث نمبر: 2695) کی ایک روایت میں ہے کہ جناب رسول اللہ ﷺ نے فرمایا: ”اگر میں کہوں «سُبْحَانَ اللهِ، وَالْحَمْدُ لِلَّهِ، وَلاَ إِلَهَ إِلاَّ اللَّهُ، وَاللَّهُ أَكْبَرُ» تو یہ مجھ کو زیادہ پسند ہے، ان تمام چیزوں سے جن پر آفتاب نکلتا ہے۔"
اسی طرح ایک اور روایت میں ہے کہ جناب رسول اللہ ﷺ نے فرمایا: ”چار کلمے تمام کلمات سے بہتر ہیں اور جس سے بھی تم شروع کرو، تمہیں کوئی نقصان نہیں، وہ یہ ہیں"سبحان الله والحمد لله ولا إله إلا الله والله أكبر".(سنن ابن ماجہ: حدیث نمبر: 3811)
2۔’’ یہ کلمے عرش کے اردگرد گھومتے رہتے ہیں، ان میں شہد کی مکھیوں کی بھنبھناہٹ کی طرح آواز ہوتی ہے۔‘‘ اس جملے کا مطلب ہے کہ قیامت کے دن ان کلمات کی شکل و صورت شہید کی مکھیوں کی طرح ہوگی، اور اعمال کا مختلف شکلوں میں متشکل ہونا احادیث مبارکہ سے ثابت ہے۔
3۔’’ شہد کی مکھیوں کی بھنبھناہٹ کی طرح آواز‘‘ اس جملہ میں ان کلمات کا کثرت کے ساتھ ذکر کرنے والے کی تشبیہ شہد کی مکھیوں کی بھنبھناہٹ کی آواز سے دی گئی ہے۔
4۔’’ اپنے کہنے والے کا ذکر کرتے ہیں۔۔۔الخ‘‘ کا مطلب یہ ہے کہ ان کلمات کے پڑھنے والا کا تذکرہ مقام اعلی میں ہوتا ہے، گویا اس جملہ میں ان کلمات کے پڑھنے کی ترغیب دی گئی ہے۔