سوال: السلام علیکم، مفتی صاحب! ایک مرد جس کا ماضی بہت خراب تھا، جس سے زنا بھی سرزد ہوا تھا، لیکِن اب سچے دل سے توبہ تائب بھی ہوچکا ہے، اور کافی متقی، پرہیز گار اور دیندار بھی ہو گیا ہے، نماز، روزہ کا پابند، چہرے پر داڑھی اور حافظ قرآن ہو گیا ہے، مطلب کہ اسکی زندگی اب پورے طریقے سے دین کے راستے پر آگئی ہے، پوچھنا یہ تھا کہ کیا توبہ کے بعد اس مرد کا کفو کوئی نیک اور دیندار اور پاکدامن لڑکی قرار پاسکتی ہے یا نہیں؟ براہ کرم رہنمائی فرمادیں۔

جواب: یاد رہے کہ گناہوں سے سچے دل سے توبہ کرنے کے بعد انسان کے گناہ معاف ہو جاتے ہیں، اور وہ فاسق و فاجر نہیں رہتا ہے، لہذا اگر مذکورہ شخص حسب، نسب، شرافت، مال اور پیشہ میں مذکورہ لڑکی کے ہم پلہ ہو، تو یہ اسکا کفو شمار ہوگا، سابقہ فسق کفو ہونے میں مانع نہیں ہوگا۔