سوال: السلام علیکم، مفتی صاحب! حضرت مفتی صاحب ! سیمنٹ کے فرش پر ناپاک پانی گرجائے اور سوکھ جائے، تو کیا وہ پاک ہوجائے گا؟ کیا سیمنٹ کے فرش میں جذب کرنے کی صلاحیت ہوتی ہے؟ جبکہ سیمنٹ سے اسے خوب (چکنا) کر دیا گیا ہو، میں نے سیمنٹ کے فرش میں خود ایکسپیریمنٹ کیا ہے، جو فرش چکنا ہوتا ہے، اس فرش میں اس طرح کی جذب کی صلاحیت نہیں ہوتی ہے، جس طرح کی مٹی چونا وغیرہ میں صلاحیت ہوتی ہے، اس میں بہت کم مقدار میں جذب کرنے کی صلاحیت ہوتی ہے، تو وہ سوکھنے کے بعد پاک ہو جائے گا؟
اسی طرح سے جو ٹائلس ماربل ہوتے ہیں، جس میں بالکل بھی جذب کرنے کی صلاحیت نہیں ہوتی، اگر اس پر ناپاک پانی گرجائے اور خشک ہو جائے، تو کیا وہ پاک ہو جائے گا یا پھر ناپاک ہی رہے گا؟

جواب: واضح رہے کہ اگر پکی زمین مثلاً: سیمنٹ، ٹائل یا ماربل وغیرہ کے فرش پر نجاست خشک ہو جائے، اور نجاست کا اثر زائل ہو جائے، تو ایسی صورت میں بغیر دھوئے وہ فرش پاک سمجھا جائے گا، اور اس جگہ نماز پڑھنا درست ہوگا۔
البتہ احتیاط کا تقاضا یہ ہے کہ اس زمین کو پانی سے تین مرتبہ دھو لیا جائے، یا اس فرش پر اتنی مقدار میں پانی بہایا جائے، جس سے نجاست کا اثر زائل ہو جائے، اس طرح کرنے سے وہ فرش خشک ہونے کے بعد پاک ہو جائے گا۔