سوال: السلام علیکم، مفتی صاحب! آج ایک صاحب سنت پر عمل کی فضیلت سے متعلق بیان میں فرما رہے تھے کہ ایک آدمی سنت کے مطابق اور دعا پڑھ کر بیت الخلاء میں داخل ہوا، اور دوسرا آدمی سنت کے خلاف مسجد حرام میں داخل ہوا، اس آدمی سے پہلا آدمی بہتر ہے، بلکہ دوسرے آدمی پر اللہ کی لعنت برس رہی ہے“
اس ضمن میں سوال یہ ہے کہ کیا دوسرے آدمی سے پہلا آدمی بہتر ہے یا نہیں اور اگر ہے، تو کیوں؟ نیز کیا واقعی دوسرے آدمی پر لعنت برستی ہے یا نہیں؟

جواب: جواب سے پہلے چند باتیں سمجھ لینی چاہیں:
1- کسى بھى عبادت کے ادا ہونے کے لیے ضرورى ہے کہ اس عبادت میں جو فرائض اور واجبات شریعت نے مقرر کیے ہیں، اگر ان کو ادا کر لیا جائے، تو شرعاً وہ عبادت ادا سمجھى جاتى ہے، چنانچہ کوئى بھی عبادت اپنے فرائض اور واجبات کے بغیر ادا نہیں ہوتی ہے۔
اور اس عبادت میں جو سنتین، آداب اور مستحبات ہوتے ہیں، ان کا اہتمام کرنا اس عبادت کى فضیلت اور ثواب میں اضافے کا باعث ہوتا ہے، لہذا اگر اس عبادت کے فرائض اور واجبات کو ادا کیا جائے اور اس عبادت کى سنتیں، آداب اور مستحبات کسى عذر یا سستى کى وجہ سے چھوٹ جائیں، تو شرعا وہ عبادت ادا ہو جاتى ہے، اگرچہ سستى کى وجہ سے سنن مؤکدہ چھوڑنے سے ثواب میں کمى واقع ہوگى، جیسے اگر کوئی شخص نماز پڑھتے ہوئے ثناء، تعوذ، تسمیہ اور رکوع و سجود کی تسبیح کسى عذرِ شرعى یا سستى و غفلت کى وجہ سے چھوڑ دے، تو صرف نماز کے فرائض اور واجبات بجا لانے سے شرعا وہ نماز ادا ہو جائے گى۔
البتہ جو نماز سنن و مستحبات کی رعایت کے ساتھ ادا کی گئی ہو، وہ اس نماز سے ثواب اور فضیلت میں بڑھی ہوئی ہے، جس نماز میں صرف فرائض اور واجبات ادا کیے گئے ہوں اور سستى اور غفلت کى وجہ سے سنن و مستحبات کو ترک کردیا گیا ہو۔
2- آنحضرت صلی اللّٰہ علیہ وسلم کی سنتوں کی دو قسمیں ہیں: سُنَنِ ھُدَیٰ اور سُنَنِ زَوَائِدْ۔
سُنَنِ ھُدَیٰ:
آنحضرت صلی اللّٰہ علیہ وسلم کے وہ اعمال ہیں، جن کو آپ صلی اللہ علیہ وسلم نے بطور عبادت سر انجام دیے ہیں۔
پھر سُنَنِ ھُدَیٰ کی دو قسمیں ہیں، جو کہ مشہور ومعروف ہیں، سنن مؤکدہ اور سنن غیر مؤکدہ۔
"سنت مؤکدہ کا اہتمام کرنا واجب کے قریب ہے، بلا کسی عذر کے سنت مؤکدہ کا ترک کرنا جائز نہیں ہے، جو شخص بلا کسی عذر کے سنت مؤکدہ ترک کرتا ہے، وہ گناہ گار اور لائق ملامت ہے"۔
(کفایت المفتی: 3 /319، دارالاشاعت)
سنت غیر مؤکدہ وہ سنت ہے، جس میں سنت مؤکدہ والی بات نہ ہو، اور اس کا حکم یہ ہے کہ اگر اس پر عمل کر لیا جائے، تو اجر و ثواب ملے گا اور اگر اسے ترک کردیں، تو اس پر کوئی گناہ نہیں ہوگا اور نہ ہی کوئی لعنت و ملامت ہوگی۔
سُنَنِ زَوَائِدْ:
آنحضرت رسول اللہ صلی اللہ علیہ وسلم نے جن اعمال کو بطورِ عادت اختیار فرمایا ہو، انہیں سنن زوائد کہتے ہیں، سُنَنِ زَوَائِدْ کو سنن عادیہ بھی کہا جاتا ہے، مثلا: کپڑے پہننے کا طریقہ، راستے میں چلنے کے آداب، مجلس میں بیٹھنے کے آداب، بیت الخلا میں جانے اور آنے کے آداب وغیرہ۔ اگر کوئی سننِ عادیہ پر بھی عمل کرتا ہے، تو اس کو ضرور ثواب ملے گا، لیکن سننِ عادیہ کے ترک پر کوئی گناہ، لعنت اور ملامت نہیں ہے۔
مذکورہ بالا باتوں کو ذہن نشین کرنے کے بعد آپ کے سوال کا جواب یہ ہے کہ آپ کے ارسال کردہ سوال میں جس انداز سے سنت کى اہمیت کو بیان کیا گیا، اگر یہ بیان واقعى اسى طرح کہا گیا ہے، جیسا کہ سوال میں درج ہے، تو ایسا انداز شرعاً مذموم ہے، بیان کرنے والے کے پیش نظر یہ ہوگا کہ سنت کى اہمیت کو واضح کیا جائے، لیکن جوشِ خطابت میں احکامِ شریعت کے بیان میں حد درجہ غلو سے کام لیا گیا ہے، کیونکہ اول تو بیت اللہ شریف میں داخل ہونا ایک عبادت ہے، جبکہ بیت الخلا میں داخل ہونا کوئی عبادت نہیں ہے، بلکہ طبعی تقاضے کو پورا کرنا ہے، اس طبعی تقاضے کے ادا کرنے کے جو مسنون آداب ہیں، ان کی بجا آوری کی وجہ سے ثواب ملے گا، ان کے ترک کرنے پر کوئی گناہ نہیں ہے اور نہ ہی اس پر لعنت برسے گی، جبکہ عمرے کے لیے بیت اللہ شریف میں داخل ہونا ایک اہم عبادت ہے، اگر عمرے کے فرائض اور واجبات ادا کر لیے جائیں، تب بھی عمرہ ادا ہو جائے گا، عمرے کے مسنون اعمال کے ترک کرنے سے ثواب میں کمی تو آئے گی، لیکن یہ ایسا گناہ نہیں ہے کہ جس پر لعنت برسے۔
پھر اس بیان میں جو بیت الخلا میں داخلے کا بیت اللہ شریف میں داخلے سے موازنہ کیا گیا ہے، وہ سخت اہانت آمیز ہے، کہاں بیت اللہ شریف جیسا نزول رحمت کا پاکیزہ مقام اور کہاں بیت الخلا؟ لہذا اس انداز بیان پر فورى طور پر توبہ واستغفار کرنا چاہیے اور آئندہ احکام شریعت کے بیان میں حد درجہ احتیاط کرنا چاہیے۔
نوٹ!
مذکورہ بالا جواب اس تناظر میں لکھا گیا ہے کہ جب سنت کی اہمیت اور اس کی فضیلت کا دل میں اعتقاد ہو اور پھر محض اپنى سستی اور غفلت کی وجہ سے کسی سنت کو ترک کیا گیا ہو، تو یہ ایسا گناہ نہیں ہے کہ اس پر لعنت ہوتى ہو، لیکن اگر سنت کو ہلکا سمجھتے ہوئے یا اس کی اہمیت کا دل میں اعتقاد نہ رکھتے ہوئے ترک کیا جائے، تو یہ بات شرعا بہت خطرناک ہے، کیونکہ اللہ تعالیٰ سے محبت کی بنیادی شرط جناب نبی اکرم صلی اللہ علیہ وسلم کی مکمل اتباع کو قرار دیا گیا ہے۔
ارشاد باری تعالی ہے:
اے نبی! آپ کہیے! اگر تم اللہ کو چاہتے ہو، تو میری پیروی کرو، تب اللہ تم سے پیار کرے گا۔
(سورۃ آل عمران: آیت نمبر 31)
لہذا جو شخص آپ صلی اللہ علیہ وسلم کی سنتوں کی جس قدر پیروی کرے گا، وہ اتنا ہی آپ کے قریب ہوگا، اس کے نتیجے میں وہ اللہ تعالی کا محبوب بن جائے گا، گویا اتباع سنت ہی روح عبادت اور حاصل بندگی ہے۔
ایک اور جگہ ارشاد باری تعالی ہے:
جس شخص نے رسول کی اطاعت کی اس نے اللہ کی اطاعت کی۔
(سورة النساء: آیت نمبر: 80 )
ارشاد باری تعالیٰ ہے:
اور جو شخص اللہ اور اس کے رسول کی اطاعت کرے گا، سو وہ بڑی کامیابی کو پہنچے گا۔
(سورۃ الأحزاب: آیت نمبر: 72)
ان قرآنی ھدایات سے اتباع سنت کی تاکید اور اہمیت کا اندازہ لگایا جاسکتا ہے۔
اسی طرح ایک حدیث مبارک میں ہے:
حضرت انس رضی اللہ عنہ سے روایت ہے کہ آنحضرت صلی اللہ علیہ وسلم نے فرمایا : جس نے میری سنت سے اعراض کیا وہ مجھ سے نہیں ہے۔
(صحیح البخاری: حدیث نمبر: 5063)
سنت پر عمل کرنے کی اس سے بڑھ کر کیا تاکید ہو سکتی ہے کہ آنحضرت صلی اللہ علیہ وسلم نے سنت ترک کرنے والے سے اپنا تعلق ہی منقطع فرما دیا۔
اللّٰہ تعالیٰ ہم سب کو آنحضرت صلی اللّٰہ علیہ وسلم کی سنتوں کی کامل اتباع نصیب فرمائے آمین۔