سوال: السلام علیکم، مفتی صاحب! حضرت علی رضی اللہ عنہ کے بارے میں لوگوں میں یہ بات مشہور ہے کہ حضرت علی کرم اللہ وجہہ نے قلعہ خیبر کا دروازہ اکھا ڑ پھینکا تھا، کیا یہ واقعہ صحیح ہے؟

جواب: حضرت علی کرم اللہ وجہہ نے غزوہ خیبر کے موقع پر دشمن سے لڑتے ہوئے قلعے کا دروازہ اکھاڑ کر اسے بطور ڈھال استعمال فرماتے ہوئے جو شجاعت کے جوہر دکھائے، اس واقعے کا تذکرہ کتب حدیث و سیرت میں موجود ہے، اس بارے میں جو روایات بیان کى گئى ہیں، ذیل میں انہیں ترتیب کے ساتھ ذکر کیا جاتا ہے:
1-حضرت ابو رافع رضی اللہ عنہ کى حدیث:
حضرت ابورافع رضی اللہ عنہ سے روایت ہے کہ ہم حضرت علی رضی اللہ عنہ کے ساتھ (خیبر کے قلعہ کی طرف) نکلے، جب نبی کریم ﷺ نے انہیں جھنڈا دے کر بھیجا تھا، جب ہم قلعہ کے پاس پہنچے، تو قلعہ والے لوگ باہر آئے، ان کے ساتھ لڑائی شروع ہوئی، ایک یہودی نے حضرت علی رضی اللہ عنہ پر حملہ کیا، حضرت علی رضی اللہ عنہ کی ڈھال ہاتھ سے گر گئی، انہوں نے قلعہ کا دروازہ اکھیڑ کر اس سے ڈھال کا کام لیا، وہ دروازہ دورانِ قتال مستقل طور پر ان کے ہاتھ میں رہا، حتی کہ اللہ تعالیٰ نے انہیں فتح عطا فرما دی۔
جنگ سے فارغ ہو کر حضرت علی رضی اللہ عنہ نے اسے اپنے ہاتھ سے پھینک دیا۔میں نے دیکھا کہ سات آدمیوں نے جن کے ساتھ آٹھواں میں تھا،اس دروازے کو ہلانے میں ایڑھی چوٹی کا زور لگا دیا، لیکن ہم اسے ہلا بھی نہیں سکے۔
(مسنداحمد: حدیث نمبر: 23858)
مذکورہ بالا روایت کى اسنادى حیثیت:
اس روایت کو امام ابن کثیر رحمہ اللہ نے "البدایۃ والنہایۃ" کى جلد 4 ص 189 میں نقل کرنے کے بعد فرمایا: اس روایت میں ایک راوى مجہول ہے اور سند میں انقطاع ہے، علامہ ہیثمى رحمہ اللہ نے اس روایت کو "مجمع الزوائد" جلد 6 ص 152 میں مسند احمد کے حوالے سے نقل کرکے فرمایا: اس روایت میں ایک راوى کا نام ذکر نہیں کیا گیا ہے، تاہم حافظ ابن حجر عسقلانى رحمہ اللہ نے اس روایت کو اپنى کتاب "فتح البارى شرح صحیح البخارى" جلد 7 ص 478 میں ذکر کرنے کے بعد اس پر کوئى کلام نہیں فرمایا، البتہ حافظ ابن حجر رحمہ اللہ نے اپنى کتاب "موافقۃ الخبر" میں اس روایت کو نقل کر کے فرمایا: "ہذا حدیث حسن"، نیز جس راوى کے نام معلوم نہ ہونے کا ذکر علامہ ہیثمى اور حافظ ابن کثیر رحمہما اللہ نے فرمایا تھا، اس راوى کے بارے میں حافظ ابن حجر رحمہ اللہ نے فرمایا: "بعض وہ راوى جن کا نام اگرچہ ہمیں معلوم نہیں ہو سکا ہے، لیکن اس حدیث کا سیاق کا تقاضہ یہ ہے کہ وہ راوى اہل بیت میں سے کوئى تابعى ہوں گے، بظاہر وہ صدوق معلوم ہوتے ہیں۔
خلاصہ یہ کہ اس روایت میں جو ضعف آرہا تھا، اس کے متعلق حافظ ابن حجر رحمہ اللہ نے وضاحت فرما کر اس حدیث کو حسن قرار دیا ہے۔
۲۔ حضرت جابر بن عبداللہ رضی اللہ عنہ کی روایت:
(الف)حضرت جابر بن عبداللہ رضی اللہ عنہ کی روایت سے دو طریق سے مروی ہے۔
1۔ مطلب بن زياد عن ليث بن أبي سليم کی طریق سے درج ذیل الفاظ کے ساتھ مروی ہے۔
حضرت علی رضی اللہ عنہ نے خیبر کے دن قلعے کے دروازے کو اٹھا لیا، حتی کہ مسلمانوں نے چڑھائی کر کے اسے فتح کر لیا، تجربہ کیا گیا، تو معلوم ہوا کہ اس دروازے کو چالیس طاقتور افراد ہی اٹھا سکتے تھے۔
مذکورہ بالا روایت کى اسنادى حیثیت:
اس روایت میں ’’ليث بن أبي سليم ‘‘ کو اکثر ائمہ جرح وتعدیل نے ’’ضعیف ‘‘ قرار دیا ہے۔
علامہ ابن حجر عسقلانی ؒ نے ’’القول المسدد‘‘ میں ’’ليث بن أبي سليم‘‘ کے بارے میں فرمایا: لیث اگرچہ ضعیف ہیں، ان کا ضعف حافظہ کی وجہ سے ہونے کی بنا پر وہ مضبوط متابع ہیں۔
علامہ سیوطی ؒ نے اس روایت کو ’’مصنف ابن ابی شیبہ‘‘ کے حوالے سے نقل کرنے کے بعد ’’حسن ‘‘ قرار دیا۔
خلاصہ کلام یہ ہے کہ اس روایت میں جو ضعف آرہا ہے، وہ ضعف یسیر (کم ) ہے، اسی وجہ سے علامہ سیوطیؒ نے اس روایت کو ’’حسن ‘‘ قرار دیا ہے۔
(ب) حرام بن عثمان عن ابي عتيق وابن جابر کی طریق سے علامہ زرکشی نے’’ التذكرة في الأحاديث المشتهرة ‘‘ میں درج ذیل الفاظ کے ساتھ نقل ہے۔
حضرت علی رضی اللہ عنہ جب قلعہ کے پاس پہنچے، تو انہوں نے قلعہ کے ایک دروازے کو اکھیڑ کر زمین پر پھینک دیا، اس کے بعد ہم میں سے ستر آدمیوں نے بڑی کوشش کر کے اس کو واپس اپنی جگہ پر رکھا۔
اس طریق میں راوی ’’حرام بن عثمان‘‘ ہیں، جن کو محدثین کرام ؒ نے ’’ضعیف‘‘ کہا ہے۔
امام بیہقیؒ نے بھی اس طریق کے ضعف کی طرف اشارہ کیا ہے۔
روایات کا حکم :
علامہ زرکشی ؒ نے اس روایت کے متعلق ارشاد فرمایا:
بعض علمائے کرام نے گمان کیا ہے کہ اس حدیث کی کوئی اصل نہیں ہے، اس کو معمولی درجہ کے لوگوں نے روایت کیا ہے، حالانکہ ایسی بات نہیں ہے، جیسے انہوں نے کہا ہے، اس روایت کو ابن اسحاق نے اپنی سیرت میں حضرت ابورافع رضی اللہ عنہ سے نقل کیا ہے۔
خلاصہ کلام:
۱۔ذکر کردہ روایت سند کے اعتبار سے اگرچہ ضعیف ہے، لیکن اس حدیث کا متابع اور شاہد موجود ہونے کی وجہ سے اس حدیث کو تقویت مل جاتی ہے اور سند میں موجود ضعف کم ہوجاتا ہے اور ضعیف روایت ضعیف سے حسن لغیرہ کے درجے تک پہنچ جاتی ہے، اور اگر بالفرض اس روایت کو ضعیف بھی مان لیا جائے، تب بھی اس روایت کا بیان کرنا درست ہے، کیونکہ اس روایت کا تعلق مناقب سے ہے اور فضائل و مناقب کے باب میں ضعیف روایت قابلِ قبول ہوتی ہے۔
مولانا سید ابوالحسن علی ندوی ؒ نے اپنی کتاب ’’المرتضیٰ‘‘ میں اس واقعے کو نقل کرنے کے بعد فرمایا: یہ روایت مختلف طریقوں سے مروی ہے اور یہ مشہور واقعہ ہے، اور اس کا واقع ہونا مستبعد نہیں ہے، اگراس کی صحت ثابت ہو جائے اور اگر اس کی کوئی اصل ہے، تو یہ عقائد اہلِ سنت کے خلاف نہیں ہے، کیونکہ اہلِ سنت کے عقائد و علمِ کلام میں آتا ہے ’’اولیاء اللہ سے کرامات کا صدور حق ہے‘‘ (81،ط:مجلس ِ نشریاتِ اسلام)