سوال: السلام علیکم، مفتی صاحب! میں وارثت کے شرعی حوالے سے آپ کی خدمت اور نصیحت کا طلبگار ہوں۔
میرے والد صاحب کی وفات 1993ء میں ہوئی، دادا کی وفات 2001ء(دادا کی وراثت میں کل جائیداد ایک عدد دوکان اور ایک گھر تھا) اور دادی کی وفات 2010ء میں ہوئی، دوکان کو ہم نے 2003ء میں فروخت کردیا تھا، میری پھوپھی نے دوکان میرے نام بغیر کسی شرائط کے ٹرانسفر کردی، اب اس دوکان کے پیسے میں نے کسی اور جگہ انویسٹ کردیئے ہیں۔
ہمارا ایک گھر بنوں میں ہے، جو میرے دادا مرحوم کی ملکیت میں تھا، گھر کے اصلی کاغذات نہ ہونے کی وجہ سے میں نے اسے ڈگری کے ذریعے اپنے نام ٹرانسفر کردیا تھا، بہر حال اس ٹرانسفر میں میری پھوپھی کی مرضی شامل نہیں ہے، میری پھوپھی زندہ ہے، ان کے چار بیٹے اور تین بیٹیاں ہیں، اب پھوپھی اپنے والد یعنی میرے دادا کی جائیداد میں وراثت کا حصہ مانگ رہی ہیں۔
1) معلوم یہ کرنا ہے کہ دوکان میری پھوپھی نے میرے نام پہلے ہی ٹرانسفر کردی تھی، اب اس دوکان یا اس دوکان کی مالیت سے جو پراپرٹی میں نے لی ہے، کیا اس میں پھوپھی کا حصہ بنتا ہے؟
2) گھر جو کہ ہمارا آبائی، وراثتی اور واحد جائیداد ہے، جو میرے دادا اور والد کی طرف سے میرے قبضے میں آئی ہے، ابھی میرا اس گھر کو فروخت کرنے کا بالکل ارادہ نہیں ہے، اس لیے کہ بنوں جاتے وقت ہمیں وہاں رُکنا پڑتا ہے، لیکن مستقبل میں اس گھر کو مارکیٹ بنانے کا ارادہ ہے، اب اس گھر میں پھوپھی حصہ مانگ رہی ہے، تو کیا پھوپھی کو انتظار کرنا چاہیے؟
میں اس میں سے ہر ایک کو یعنی پھوپھی، میری والدہ، اور میری بہنوں کا حصہ ادا کرنے کا ارادہ رکھتا ہوں، گھر کی مالیت کا اندازہ چار کروڑ روپے تک کا ہے، مارکیٹ ویلیو کا تعین نہیں کیا ہے، براہ کرم رہنمائی فرمادیں۔

جواب: 1) واضح رہے کہ میراث میں جائیداد کی تقسیم سے پہلے کسی وارث کا اپنے شرعی حصہ سے بلا عوض دست بردار ہوجانا شرعاً معتبر نہیں ہے۔
اسی طرح ایک وارث کا دوسرے ورثاء کی اجازت کے بغیر ان کے حصہ میں تصرف کرنا جائز نہیں ہے۔
اس تمھید کے بعد سوال میں پوچھی گئی صورت میں دادا کی میراث کی تقسیم سے پہلے آپ کی پھوپھی کا دیگر ورثاء کی اجازت کے بغیر دکان آپ کے نام ٹرانسفر کرنا درست نہیں تھا، لہذا اس دکان میں دادا کے تمام شرعی ورثاء اپنے حصے کے مطابق شریک ہوں گے، صورت مسئولہ میں آپ نے اس دکان کو بیچ کر جو پراپرٹی خریدی ہے، اس پراپرٹی میں تمام ورثاء اپنے حصے کے بقدر شریک ہوں گے۔
2) واضح رہے کہ میراث کی تقسیم میں حتی الامکان جلدی کرنی چاہیے، بغیر کسی سخت مجبوری کے تاخیر کرنا درست نہیں ہے، خاص طور پر جب کہ دیگر ورثاء اپنے حق کا مطالبہ کر رہے ہوں، لہذا اگر آپ وہ مکان فی الحال نہیں بیچنا چاہتے ہیں، تو آپ پر لازم ہے کہ ورثاء کو ان کے شرعی حصے کے بقدر اس مکان کی موجودہ مالیت کے مطابق قیمت ادا کر دیں۔