سوال: ایک شخص نے غصے کی حالت میں طلاق دی، کتنی دی یہ معلوم نہیں، طلاق کے وقت بیوی، والدہ اور بہن موجود تھیں، والدہ کا کہنا ہے میں نے ایک طلاق سنی اور کمرے سے باہر چلی گئی، بہن کا ذہنی توازن درست نہیں، جب شوہر طلاق دے کر گھر سے باہر نکلا، تو گاؤں والوں نے پوچھا کہ کتنی طلاق دی ہیں؟ کہا جتنی دینی تھی دے دی ہیں، بیوی دو طلاق کا کہہ رہی ہے، معلوم یہ کرنا کہ کتنی طلاقیں واقع ہو گئی ہیں؟
شوہر کو بالکل بھی تعداد نہیں معلوم ہے، جبکہ شوہر کی والدہ کہہ رہی ہے کہ میں ایک مرتبہ سن کر کمرے سے نکل گئی تھی اور بیوی دو کا دعوی کر رہی ہے، اس صورت میں کتنی طلاقوں کا حکم لگے گا؟

جواب: پوچھی گئی صورت میں اگر واقعتاً شوہر کو طلاق دینا یاد ہے، مگر طلاقوں کی تعداد بالکل بھی یاد نہیں، نیز بیوی کو یقینی طور پر یاد ہو کہ شوہر نے دو طلاقیں دی ہیں، دو سے زیادہ نہیں دی، تو شرعاً اس صورت میں دو طلاقیں واقع ہوگئی ہیں، جس کا حکم یہ ہے کہ عدت کے دوران شوہر اگر رجوع کرنا چاہے، تو کر سکتا ہے۔
رجوع کرنے کا طریقہ یہ ہے کہ زبان سے کہہ دے کہ "میں نے رجوع کرلیا ہے" تو رجوع ہو جائے گا، اور بہتر یہ ہے کہ اس پر دو گواہ بھی بنالے، اور اگر زبان سے کچھ نہ کہے، مگر آپس میں میاں بیوی کا تعلق قائم کرلے یا خواہش اور رغبت سے اس کو ہاتھ لگالے، تب بھی رجوع ہو جائے گا، البتہ اگر عدت گزر گئی ہو، تو پھر باہمی رضامندی سے نیا مہر مقرر کرکے گواہوں کی موجودگی میں دوبارہ نکاح کرنا ہوگا۔
واضح رہے کہ ذکرکردہ صورت میں رجوع یا نیا نکاح کرنے کے بعد آئندہ شوہر کو صرف ایک طلاق دینے کا اختیار باقی ہوگا۔