سوال: ایک شخص سوتا رہ جائے جب آنکھ کھلے اس وقت نماز پڑھ لے، کیا یہ کسی حدیث میں آیا ہے؟

جواب: جی ہاں ! یہ حدیث مسلم شریف، باب قَضَاءِ الصَّلاَةِ الْفَائِتَةِ وَاسْتِحْبَابِ تَعْجِيلِ قَضَائِهَا، حدیث نمبر:1562 ،سنن ابن ماجہ، حدیث نمبر: 698 اور دیگر احادیث کی کتب میں موجود ہے۔
تشریح:
اگر کوئی شخص نماز کا وقت داخل ہونے سے پہلے سوجائے اورسونے سے پہلے جاگنے کے اسباب اختیار کر چکا ہو اور پھر کسی وجہ سے نہ اٹھ سکے تو اس حالت میں نماز قضاء ہونے پر کوئی گناہ نہیں ہے ۔
اسی طرح کسی سے بھول ہو گئی اور پورا نماز کا وقت گزر گیا اس کو یاد ہی نہیں آیا کہ نماز کا وقت داخل ہوکر گزر بھی چکا ہے، چونکہ بھول اور چوک اس امت سے معاف ہے؛ جیسے حدیث شریف میں ہے:"رسول اللہﷺ نے فرمایا اللہ تعالی نےمیری امت سے خطا اور بهول معاف کردی گئی ہے"۔
لہذا ان دونوں وجوہات کی وجہ سے اس پر گناہ نہیں ہے، البتہ اس حدیث میں قضاء پڑھنے کا اشارہ مل رہا ہے کہ جب اسے یاد آئے یا وہ نیند سے اٹھ جائے تواسے نماز پڑھنی پڑےگی ، قضاء کسی صورت میں معاف نہیں ہے۔