سوال: میں نے شراب کے نشے کی حالت میں اپنی بیوی کو طلاق دی، حالت یہ تھی میری کہ مجھے یاد نہیں، اب 2 گواہ تھے، ایک مرد ایک عورت مرد جو تھا مجھ سے زیادہ نشے میں تھا، اس کا کہنا ہے کہ میں نے 3 دی جو عورت موجود تھی اس کا کہنا ہے کہ کے 2 دی میری بیوی کا کہنا ہے کہ ایک دی اور مجھے بلکل یاد نہیں میں نے دی بھی یا نہیں؟ معلوم یہ کرنا ہے کہ ایسی صورت میں کتنی طلاقیں واقع ہوگئی ہیں؟ جواب کا منتظر رہوں گا شکریہ

جواب: واضح رہے کہ شراب پینا حرام اور گناہِ کبیرہ ہے، اور گناہ کر کے انسان معذور قرار نہیں پاتا، اس لیے نشہ کی حالت میں دی ہوئی طلاق واقع ہو جاتی ہے، لہذا سوال میں ذکرکردہ صورت میں جب آپ کو یاد نہیں ہے کہ کتنی طلاق دی تھیں اور اس موقع پر موجود گواہوں میں بھی اختلاف پایا جاتا ہے، تو اس صورت میں چونکہ ایک طلاق یقینی ہے، لہذا ایک طلاق رجعی واقع ہوگی۔
جس کا حکم یہ ہے کہ شوہر عدت کے اندر بغیر نکاح کے رجوع کرسکتا ہے اور رجوع کرنے کا طریقہ یہ ہے کہ زبان سے کہہ دے کہ "میں نے رجوع کرلیا ہے" تو رجوع ہوجائے گا، اور بہتر یہ ہے کہ اس پر دو گواہ بھی بنالے۔ اگر زبان سے کچھ نہ کہے، مگر آپس میں میاں بیوی کا تعلق قائم کرلے یا خواہش اور رغبت سے اس کو ہاتھ لگالے، تب بھی رجوع ہو جائے گا، البتہ اگر عدت گزر گئی، تو پھر باہمی رضامندی سے نیا مہر مقرر کرکے گواہوں کی موجودگی میں دوبارہ نکاح کرنا ہوگا۔
واضح رہے کہ صورت مسئولہ میں رجوع یا نیا نکاح کرنے کے بعد آئندہ شوہر کو صرف دو طلاق دینے کا اختیار باقی ہوگا۔