سوال: حضرت عائشہؓ نے حضورﷺ سے دریافت کیا کہ کوئی شخص بغیر شہادت کے بھی شہیدوں کے ساتھ ہوسکتا ہے؟ حضورﷺ نے فرمایا کہ جو شخص دن رات میں 20 مرتبہ موت کو یاد کرے وہ شہیدوں کے ساتھ ہوسکتا ہے۔
ایک حدیث میں ہے کہ جو شخص 25 مرتبہ "اللہم بارک لی فی الموت وفی ما بعد الموت" پڑھے، وہ شہادت کے درجہ میں ہوسکتا ہے۔" (مرقاۃ: جلد 5 صفحہ نمبر270) اس بارے میں وضاحت فرمادیں کہ کیا مندجہ بالا دونوں حدیثیں صحیح ہیں؟

جواب: سوال میں ذکر کردہ روایت کو امام طبرانیؒ نے ’’المعجم الاوسط‘‘میں ذکر کیا ہے، ذیل میں مکمل روایت، متن، ترجمہ اور حکم کے ساتھ بیان کی جاتی ہے:
حضرت عائشہ رضی اللہ عنہا فرماتی ہیں کہ میں نے جناب رسول اللہ ﷺ سے عرض کیا: اے اللہ کے رسول ! کیا شہید صرف وہی شخص ہے جو اللہ کے راستہ میں قتل کر دیا جائے؟ جناب رسول اللہ ﷺ نے ارشاد فرمایا: اس طرح تو میری امت کے بہت ہی تھوڑے لوگ شہید کہلائیں گے، جو شخص دن میں پچیس مرتبہ یہ پڑھے: "اللهم بارك في الموت وفيما بعد الموت" (اے اللہ موت اور موت کے بعد برکت عطا فرما) پھر اگر اسے اپنے بستر پر موت آئے تو بھی اللہ تعالی اُسے شہید کا اجر عطا فرمائیں گے۔
(المعجم الاوسط:حدیث نمبر:7676)
روایت کی اسنادی حیثیت:
علامہ ہیثمی ؒ فرماتے ہیں: امام طبرانىؒ نے "المعجم الاوسط" میں یہ روایت نقل کی ہے، اور اس کی سند میں ایسے روای ہیں جنہیں میں نہیں جانتا۔
علامہ مرتضی زبیدی ؒ فرماتے ہیں: اس کی سند میں ایسے راوی ہیں جن کے حال کی معرفت نہیں ہے۔
خلاصۂ کلام:
ذکرکردہ روایت "شدید ضعیف" ہے، لہذا اسے جناب رسول اللہ ﷺ کی طرف منسوب کرکے بیان کرنا درست نہیں ہے۔