سوال: ایک حديث میں ہے کہ محمد صلی اللہ علیہ وسلم سب سے خوبصورت تھے اور دوسری حديث میں ہے کہ یوسف علیہ السلام سب سے خوبصورت تھے اور ان کو اللہ نے نصف خوبصورتی دی تھی، مفتی صاحب! ان دونوں حدیثوں کی وضاحت فرمادیں۔

جواب: ہمارے پیارے رسول حضرت محمد مصطفی ﷺ اللہ تعالیٰ کی مخلوق میں سب سے زیادہ حسین وجمیل اور نہایت خوب صورت ہیں، یعنی آپ ﷺ کے اعضائے مبارکہ اور جسم مبارک کا ہر ہر جزو، بدنِ اطہر کی ساخت وپرداخت وغیرہ سب سے زیادہ معتدل تھا۔
جیسا کہ حدیث شریف میں ہے، حضرت قتادہ رحمۃ اللّٰہ علیہ فرماتے ہیں: اللہ تعالی نے ہر نبی کو خوب صورت چہرے اور بہترین آواز والا بنا کر مبعوث فرمایا اور تمہارا نبی ان سب میں سب سے زیادہ خوب صورت چہرے اور سب سے اچھی آواز والا ہے۔(شمائل ترمذی: حدیث نمبر: 303)
اسی طرح حضرت یوسف علیہ السلام کے بارے میں حدیث میں آتا ہے کہ انھیں (سارے انسانوں کی خوبصورتی اور حسن و جمال میں سے) آدھا حسن عطا کیا گیا تھا۔(صحیح مسلم، حدیث نمبر:162)
اس روایت سے یہ شبہ پیدا ہوتا ہے کہ حضرت یوسف علیہ السلام جناب رسول اللہ ﷺ سے زیادہ حسین تھے اور بظاہر دونوں روایات میں تعارض نظر آتا ہے۔
علمائے کرام نے اس تعارض کے کئی جوابات دیے ہیں:
1- حدیث میں کہا گیا ہے کہ ’’حضرت یوسف علیہ السلام کو نصف حسن سے نوازا گیا تھا ‘‘ اس کا مطلب یہ ہے کہ جناب رسول اللہﷺ کو جو حسن دیا گیا تھا، اس حسن کا نصف حضرت یوسف علیہ السلام کو دیا گیا تھا۔
2- عربی کا اصول ہے کہ متکلم (بات کرنے والا) خود عمومِ کلام میں داخل نہیں ہوتا ہے، اس لیے ’’حضرت یوسف علیہ السلام کو نصف حسن سے نوازا گیا تھا ‘‘ کا مطلب یہ ہے کہ جناب رسول اللہ ﷺ کے علاوہ دیگر انسانوں میں حضرت یوسف علی نبینا وعلیہ الصلاة والسلام کو نصف حسن دیا گیا تھا۔
اس کی تائید حضرت عائشہ رضی اللہ عنہا کے اس شعر سے بھی ہوتی ہے، جس کا ترجمہ یہ ہے: حضرت یوسف علیہ السلام کا حسن دیکھ کر عورتوں نے اپنی انگلیاں کاٹ لی تھیں، اگر وہ آپ صلی اللہ علیہ وسلم کا حسن وجمال دیکھ لیتیں تو اپنے دل کاٹ لیتیں۔
3- حکیم الامت حضرت مولانا اشرف علی تھانوی(م 1362ھ) رحمہ اللہ نے بڑی اچھی توجیہ ذکر فرمائی ہے کہ حسن کی مختلف قسمیں ہیں:
ایک قسم یہ ہے کہ جو دیکھنے والے کو فورا متحیر کردے اور اس کے دقائق (باریکی) تامل اور غور و فکر کرنے سے متناہی (ختم) ہوجائیں، اس کا لقب حسنِ صباحت مناسب ہے۔
اور دوسری قسم وہ ہے کہ جو دیکھنے والے کو فورا تو متحیر نہ کرے، مگر جوں جوں اس کو دیکھا جائے، توں توں تحمل سے باہر ہوتا جائے اور غور وفکر کرنے سے حسن مزید دل میں گھستا چلاجائے، اس کا لقب حسنِ ملاحت مناسب ہے۔
پہلی قسم کے اعتبار سے حضرت یوسف علیہ السلام زیادہ حسین ہوں اور دوسری قسم میں حضور ﷺ زیادہ حسین ہوں، یعنی حضرت یوسف علیہ السلام کا حسن ظاہری طور پر بہت زیادہ ہو اور ایک حد تک ہو۔ اور حضور ﷺ کا حسن معنوی طور پر بہت لطیف اور نازک ہو اور بے انتہا ہو۔ پہلی قسم کا نام حسن صباحت (یعنی صاف رنگ کی خوبصورتی) اور دوسری قسم کا نام حسن ملاحت (یعنی چہرے کی کشش کی خوبصورتی) ہو۔
مولانا خلیل احمد سہارنپوری ؒ (م1346ھ)نے لکھا ہے کہ حسن اور جمال میں فرق ہے ۔ کسی چیز کا حسن دیکھنے والوں کی نسبت سے ہوتا ہے اور جمال جو کسی چیز میں ذاتی طور پر موجود ہوتا ہے تو حسین وہ ہوتا ہے جس کو لوگ اس کےصاف رنگ کی وجہ سے خوبصورت سمجھیں اور جمیل وہ ہوتا ہے جس کے جسم کے اعضاء متناسب اور معتدل ہو ،لہذا حضرت یوسف علیہ السلام تمام لوگوں میں سب سے زیادہ حسین تھے اور جناب رسول اللہ ﷺ تمام لوگوں میں سب سے زیادہ جمیل تھے او یعنی آپ ﷺ کے اعضائے مبارکہ اور جسم مبارک کا ہر ہر جزو، بدنِ اطہر کی ساخت وپرداخت وغیرہ سب سے زیادہ معتدل تھا۔
علامہ قرطبی ؒ نے لکھا ہے کہ ہمارے سامنے جناب رسول اللہ ﷺ کا پورا حسن اللہ تعالٰی نے ظاہر نہیں فرمایا، اگر اللہ تعالیٰ آپ ﷺ کا پورا حسن ظاہر فرما دیتے تو ہماری آنکھیں آپ ﷺ کو دیکھنے کی طاقت نہ رکھتی۔