سوال: سنا ہے کہ حدیث شریف میں آیا ہے کہ حاجی کی دعا ربیع الاول تک قبول ہوتی ہے، کیا یہ بات صحیح ہے؟

جواب: حج کی ادائیگی کے بعد کتنی مدت تک حاجی کی دعا قبول ہوتی ہے، اس حوالہ سے دو طرح کی روایات ملتی ہیں:
(1)مرفوع روایت (جس میں نبی ﷺ کی جانب روایت کومنسوب کیا گیا ہو)،اس میں ماہ محرم کے گزرنے تک قبولیتِ دعا کی تحدید ہے۔
(2)موقوف روایت(جس میں صحابی رضی اللہ عنہ کی جانب اس قول کی نسبت کی گئی ہو)، اس قسم کی روایات میں دس یا بیس ربیع الاول تک کی صراحت ہے۔
تاہم تمام روایات انقطاع وضعف سے خالی نہیں ہیں، لیکن تعدد ِ روایات اور بعض مطلق شواہد (جن میں کسی قسم کی تحدید وتعیین نہیں) کی بناء پر مذکورہ تمام روایات کی روشنی میں دریافت کردہ روایت کی اصل ہونا معلوم ہوتی ہے، لہذا روایت کے مضمون کو آگے بیان کرنے میں حرج نہیں۔
مرفوع روایات کی تخریج :
(1)علامہ فاکہی رحمہ اللہ نے اپنی سند سے معاویة سے نقل کیا ہے کہ رسول اللہﷺ نے ارشاد فرمایا:"حاجی، اورجس کے لیے حاجی مغفرت کی دعا کرے، ماہ محرم کے گزرنے تک بخشش کی دعا قبول کی جاتی ہے۔" (أخبار مكة في قديم الدهر وحديثه، للفاکهي، 425/1، المحقق: د. عبد الملك عبد الله دهيش، الناشر: دار خضر – بيروت)
(2) حضرت علقمہ رضی اللہ عنہ سے روایت ہے کہ نبیﷺنے ارشاد فرمایا:"حاجی، اورجس کے لیے حاجی مغفرت کی دعا کرے، ماہ محرم کے گزرنے تک بخشش کی دعا قبول کی جاتی ہے"۔( مسند أبي حنيفة رواية الحصكفي، کتاب الحج، تحقيق: عبد الرحمن حسن محمود، الناشر: الآداب – مصر)
موقوف روایات کی تخریج:
(1)علامہ دینوری رحمہ اللہ نے اپنی سند سے یاسین بن زیات سے نقل کیا ہے، وہ فرماتے ہیں کہ حاجی، اور جس کے لیے حاجی مغفرت کى دعا کرے، دونوں کی مغفرت کردی جاتی ہے،جس کی مدت ذی الحجہ کے بقیہ ایام، محرم، صفر اور ماہ ربیع الاول کے ابتدائی بیس دن تک ہے۔(المجالسة وجواهر العلم، 147/6، رقم الحدیث :2476، جمعیة التربیة الإسلامیة)
(2) حضرت مہاجر سے روایت ہے کہ حضرت عمر بن خطاب رضی اللہ عنہ نے ارشاد فرمایا: حاجی اور جس کے لیے حاجی مغفرت کی دعا مانگے دونوں کی مغفرت کردی جاتی ہے، (اس قبولیت ِ دعا کی تحدید) ذی الحجہ کے بقیہ ایام، محرم، صفر اور ربیع الاول کے دس دن ہیں۔
مضمون کی تائید کے لیے مطلق شواہد:
مندرجہ بالا مضمون کی تائید کے لئے مطلق شواہد درج ِ ذیل ہیں، جن میں مدت کی تعیین نہیں ہے:
(1) حضرت ابوہریرہ رضی اللہ عنہ سے روایت ہے کہ رسول اللہ ﷺ نے ارشاد فرمایا : حاجی اور جس کے لئے حاجی مغفرت کی دعا کرے، دونوں کی مغفرت کردی جاتی ہے۔ (صحیح ابن خزیمة، لأبي بکر محمد بن إسحاق السلمي النیسابوري، کتاب المناسک، باب استحباب دعاء الحاج، 132/4، رقم الحدیث:2516، المحقق: د. محمد مصطفى الأعظمي، الناشر: المكتب الإسلامي – بيروت)
(2) حضرت ابو موسی اشعری رضی اللہ عنہ سے مرفوعا روایت ہے کہ رسول اللہ ﷺنے ارشادفرمایا: حاجی اپنے خاندان میں چار سو افراد کے لیے سفارش کرے گا، اور اپنے گناہوں سے اس طرح بخش دیا جاتا ہے گویا کہ اس کی ماں نے آج ہی جنا ہو۔ (مسند البزار المنشور باسم البحر الزخار، لأبي بکر أحمد بن عمرو المعروف ب"البزار"، مسند أبي حمزة أنس بن مالک، 135/17، رقم الحدیث:9726، محقق الأجزاء من 10 إلى 17: عادل بن سعد، مکتبة العلوم الحکم)
(3) حضرت عبداللہ بن عمر رضی اللہ عنہما سے روایت ہے کہ جب حاجی سے ملاقات کرو تو اسے سلام کرکے مصافحہ کرو، اور اس کو گھر میں داخلہ سے قبل اپنے لیے دعاء مغفرت کی درخواست کرو، چونکہ حق تعالی کی جانب سے اس کی بخشش کردی گئی ہوتی ہے۔(مسند أحمد، لأبي عبدالله أحمد بن حنبل الشیباني، مسند المکثرین من الصحابة، مسند عبدالله بن عمر رضي الله عنهما، 272/9، رقم الحدیث: 5371، المحقق: شعيب الأرنؤوط - عادل مرشد، وآخرون، إشراف: د عبد الله بن عبد المحسن التركي، الناشر: مؤسسة الرسالة)