سوال: مجھے بہت وسوسے آتے ہیں، ان وسوسوں سے بچنے کے لیے میں نے قسم کھائی کہ "اگر میں نے فلاں کام کیا یا اگر میں نے شیطانی وسواس کا جواب دیا تو میں کافر ہو جاؤں گا" بعد میں جلد ہی مجھے اپنی غلطی کا احساس ہو گیا اور میں نے اللہ تعالی سے معافی مانگ لی تو کیا میں اب بھی اس جواب دینے سے کافر ہوجاؤں گا؟

جواب: واضح رہے کہ اگر کوئی شخص قسم کھائے کہ "اگر فلاں کام کروں تو کافر ہوجاؤں"، ان الفاظ سے قسم منعقد ہوجاتی ہے اور مذکورہ کام سے رکنا ضروری ہوجاتا ہے اور اگر قسم ٹوٹ جائے تو اس شخص پر قسم توڑنے کا کفارہ لازم ہوجاتا ہے، البتہ مذکورہ بالا قسم کھانے یا توڑنے سے آدمی کافر نہیں ہوتا ہے، لیکن آئندہ اس قسم کے الفاظ کہنے سے اجتناب کرنا چاہیے۔