سوال: مفتی صاحب! سجدہ سہو کسے کہتے ہیں اور نماز میں کن غلطیوں کی وجہ سے سجدہ سہو کرنا واجب ہوتا ہے؟

جواب: واضح رہے کہ کبھی نماز میں بھول کر ایسی غلطی ہوجاتی ہے جس سے نمازفاسد تو نہیں ہوتی، لیکن اس کی وجہ سےنماز میں نقصان واقع ہوجاتا ہے، اس نقصان کے ازالے کے لیے شریعت مقدسہ نے سجدہ سہو کو ضروری قرار دیا ہے، جس کے کرنے سے نقصان کی تلافی ہوجاتی ہے اور نماز کامل طریقہ سے اداہوجاتی ہے۔
نماز میں مندرجہ ذیل غلطیاں بھول کر کرنے سے سجدہ سہو واجب ہوجاتا ہے:
نماز میں بھول کر کسی واجب کے چھوٹ جانے یا نماز کے واجبات اور فرائض میں سے کسی واجب یا فرض کی ادائیگی کو مؤخر کرنے یاکسی فرض کو پہلے ادا کرنے یا تکرار کے ساتھ اداکرنے یاکسی واجب کو تبدیل کرنے جیسی صورتوں میں سجدہ سہو واجب ہوجاتاہے اور سجدہ سہو سے اس غلطی کی تلافی ہوجاتی ہے، البتہ اگر جان بوجھ کر ان غلطیوں میں سے کوئی غلطی کی جائے تو پھر سجدہ سہو سے تلافی نہیں ہوگی، بلکہ نماز کو دوباره پڑھنا لازم ہوگا۔ اسی طرح اگر کوئی فرض چھوٹ جائے تو اس کی تلافی بھی سجدہ سہو سے نہیں ہوگی، نیز نماز کی سنن اور مستحبات چھوٹ جانے سے سجدہ سہو واجب نہیں ہوتا ہے۔