سوال: اسلام آباد کی ایک پرائیویٹ سوسائیٹی میں ایک پلاٹ پراپرٹی ڈیلر کے ذریعے بُک کیا اسکے بقول آدھی رقم دیں اور ڈسکاؤنٹ سے فائیدہ اٹھائیں آپ کی رقم پوری تصور ہوگی جب قسط کی باری آئی تو کہا 120000روپے جمع کرائیں لیجر میں آپ کے 168000 روپے جمع تصور ہونگے یعنی48000 روپے کا ڈسکاؤنٹ دینگے یعنی یہ رقم ایک طرح کا نفع ہے ڈیلر صاحب ہماری رقم کو آگے APR یعنی Advance Payment Receipt کے تحت فارمز پر چڑھا کے اصل سوسائیٹی کو جمع کرتے ہیں ان سے اس بابت پوچھا تو ڈیلر نے کہا کہ ہم لوگوں نے سوسائٹی کو ایڈوانس رقم جمع کرائی ہوتی ہے اب ہم ان APR کو ایڈجسٹ کرتے ہیں جس پر وہ ہمیں ڈسکاؤنٹ دیتے ہیں۔
پوچھنا یہ تھا کہ کیا یہ کوئی سودی معاملہ تو نہیں؟ ڈیلر نے کہا کہ یہ سود نہیں ہے لیکن مجھے تسلی نہ ہوئی۔ برائے کرم تحقیق کرکے رہنمائی فرمائیں کہ کیا میرے لیے اس ڈسکاؤنٹ سے فائدہ اٹھانا جائز ہے؟

جواب: پوچھی گئی صورت میں ڈیلر کو ایڈوانس رقم دیکر سوسائٹی والوں سے پلاٹ کی کل قیمت میں ڈسکاؤنٹ حاصل کرنا شرعا درست ہے، ایسا ڈسکاؤنٹ سود کے حکم میں داخل نہیں ہے۔
البتہ اگر پلاٹ کا سودا حتمی ہوجاتا ہے، اور قسطوں وغیرہ کی تعیین ہوجانے کے بعد سوسائٹی کی طرف سے یہ آفر کی گئی ہو کہ ساری یا کچھ رقم یکمشت جمع کرانے کی صورت میں آپ کو ڈسکاؤنٹ ملے گا تو طے شدہ مدت سے پہلے رقم دینے کی وجہ سے ملنے والا یہ ڈسکاؤنٹ سود کے حکم داخل ہوگا، جس سے اجتناب لازم ہے۔