سوال: مندرجہ ذیل روایت کی تصدیق کردیجیۓ اور یہ بھی بتادیجیئے کہ کیا اس کو فضائل میں بیان کرنا ٹھیک ہے؟
حضرت جابرؓ سے حضور ﷺ کا ارشاد منقول ہے "جو شخص سورۃ انعام کی شروع کی تین آیتیں پڑھے اس پر اللہ تعالی 40 ہزار فرشتے مقرر فرما دیتے ہیں، جو اس کے لیے قیامت کے دن تک اپنی عبادت کے برابر ثواب لکھتے رہتے ہیں اور ساتویں آسمان سے ایک فرشتہ اترتا ہے جس کے ہمراہ لوہے کا ایک گرض ہوتا ہے، جب کبھی شیطان اس کو وسوسہ ڈالنے کا یا اس کے دل میں کوئی برا خیال ڈالنے کا ارادہ کرتا ہے تو فرشتہ اس شیطان کو اس زور سے گرض مارتا ہے کہ اس آدمی اور شیطان کے درمیان ستر پردے حائل ہو جاتے ہیں، پھر جب قیامت کا دن ہوگا تو اللہ تعالی اس دن اس آدمی سے فرمائیں گے تو میری رحمت کے سائے میں چل، جبکہ میرے سائے کے سوا کوئی سایہ نہیں اور میری جنت کے پھلوں میں سے کھا اور حوض کوثر سے پانی پی اور نہر سلسبیل میں غسل کر تو میرا بندہ اور میں تیرا رب ہوں"۔ (بحوالہ تفسیر قرطبی)

جواب: جی ہاں! سوال میں مذکور حدیث حضرت جابر بن عبد اللہ رضی اللہ عنہما سے "تفسیر ثعلبی" میں روايت كى گئى ہے، اس حدیث کے ایک راوى "محمد بن عبد ربه" کو محدثین نے ضعیف قرار دیا ہے، تاہم اس حدیث کے تین شواھد بھی ہیں، یعنی اس میں مذکور مضمون دیگر تین صحابہ کرام: حضرت عبد الله بن مسعود، حضرت انس بن مالک اور حضرت عبد اللہ بن عباس رضوان اللہ عنہم اجمعین سے بھى مروى ہے، اور وہ تین احادیث اس حدیث کو تائید اور تقویت فراہم کرتی ہیں، لہذا سورۃ الأنعام کی ابتدائی تین آیات کی فضیلت حاصل کرنے کے لیے تلاوت کرنا اور اس حديث كو ضعف کی صراحت کے ساتھ بيان كرنے کی گنجائش ہے، ذيل ميں اس حدیث اور اس کے شواھد کا ترجمہ، تخریج اور ان کى اسنادى حیثیت کو بیان کیا جاتا ہے۔
حضرت جابر بن عبداللہ رضی اللّٰہ عنہما کی حدیث
ترجمہ: حضرت جابر بن عبداللہ رضی اللہ تعالی عنہما سے مروی ہے کہ رسول اکرم صلی اللہ علیہ وسلم کا ارشاد ہے: "جو شخص سورۃ الأنعام کی ابتدائی تین آیات کی تلاوت کرے تو اللہ تعالی اس پر 40 ہزار فرشتے مقرر فرما دیتے ہیں، جو اس کے لیے قیامت تک اپنی عبادت کے برابر ثواب لکھتے رہتے ہیں اور ساتویں آسمان سے ایک فرشتہ نازل ہوتا ہے، جس کے پاس لوہے کا ایک گُرز (ہتھوڑا) ہوتا ہے، جب کبھی بھی شیطان اس شخص کو وسوسوں میں مبتلا کرنے کی کوشش کرتا ہے یا اس کے دل میں کوئی برا خیال ڈالتا ہے تو وہ فرشتہ شیطان کو اتنے زور سے گرز (ہتھوڑا) مارتا ہے کہ اس آدمی اور شیطان کے درمیان ستر پردے حائل ہو جاتے ہیں، پھر جب قیامت کا دن ہوگا تو اللہ تعالی اس آدمی سے فرمائیں گے: تو میرے (رحمت کے) سائے میں چل اور میری جنت کے پھلوں میں سے کھا اور حوض کوثر سے پانی پی اور نہر سلسبیل کے پانی سے غسل کر، کیونکہ تو میرا بندہ اور میں تیرا رب ہوں"۔
تخریج الحدیث:
1- اس حدیث کو امام ابو اسحاق أحمد بن محمد الثعلبی رحمہ اللّٰہ (م 427ھ) نے اپنی تفسیر "الكشف والبيان عن سورة القرآن" المعروف ب "تفسیر ثعلبی" ج 12 ص 16، رقم الحدیث (1340) سورۃ الأنعام، ط: دار إحياء التراث العربي، بيروت لبنان، میں نقل کیا ہے۔
2- ابو الحسن علی بن احمد بن محمد بن علی الواحدی النیسابوری رحمہ اللہ (م 468ھ) نے اپنى تفسیر "الوسیط" 2/ 250، سورة الأنعام، ط: دار الکتب العلمیۃ بیروت، میں اس حدیث کو "مرسلا عن أبي صالح"، نقل كىا ہے، اس کے آخر میں یہ اضافہ ہے کہ "تجھ پر نہ کوئى حساب ہے اور نہ ہى کوئى عذاب ہوگا"۔
حدیث کی اسنادی حیثیت:
۱) اس حدیث کے ایک راوی "محمد بن عبد ربه بن سلیمان المروزي" کو حافظ ابن حجر عسقلانی رحمہ اللّٰہ (م 852ھ) نے "لسان المیزان" ج7 ص 275، ط: مکتب المطبوعات الإسلامية، میں ضعیف قرار دیا ہے۔
۲ ) اس حدیث کے دوسرے راوی "منصور بن عبد الحمید أبو نصر الباوردي" کے متعلق "لسان المیزان" 8/ 164، میں حافظ ابن حجر عسقلانی رحمہ اللّٰہ (م 852ھ) نے فرمایا: ان کو ابن حبان نے اپنى کتاب "الثقات" میں ذکر کر کے ان کے متعلق کہا ہے کہ جب ان سے اوپر اور ان سے نیچے کے رواى ثقہ ہوں، تب ان کى روایت معتبر سمجھی جائے گی۔ (جبكہ مذكوره روايت ميں منصور بن عبد الحمید سے نیچے جو راوى ہے، وہ "محمد بن عبد ربہ" ہے اور وہ ضعیف ہے، جبکہ ان سے اوپر جو راوى ہے وہ "حجاج بن محمد المصیصی" ہے، وہ ثقہ راوى ہے)۔
حدیث جابر رضی اللہ عنہما کے شواھد
۱) حدیثِ عبد اللہ بن مسعود رضی اللہ عنہ
ترجمہ: حضرت عبد اللہ بن مسعود رضی اللہ عنہ سے مروى ہے کہ میں نے رسول اللہ صلى اللہ علیہ وسلم کو یہ فرماتے ہوئے سنا:"جس شخص نے فجر کى نماز امام کے ساتھ جماعت کے ساتھ ادا کى اور نماز ختم ہونے کے بعد وہ اپنى جائے نماز پر بیٹھا رہا اور اس نے سورۃ الأنعام کى ابتدائى تین آیات کى تلاوت کى تو اس پر اللہ تعالى ستر فرشتے مقرر فرما دیں گے، وہ فرشتے اللہ تعالى کى تسبیح کرتے اور اس شخص کے لیے قیامت تک کے لیے استغفار کرتے رہیں گے اور اللہ تعالى آسمان سے ایک فرشتہ نازل فرمائیں گے"۔
تخریج الحدیث:
۱) امام ابو عمرو محمد بن یحیى بن الحسن الجوری النیسابوری رحمہ اللہ (م 427ھ) نے اپنى کتاب "قوارع القرآن" ص 109 رقم الحدیث (54)، ط: مکتبۃ المعارف الریاض میں اس حدیث کو نقل کیا ہے۔
۲) امام ابو شجاع الدیلمی رحمہ اللہ (م 509ھ) نے اپنى کتاب "مسند الفردوس "اس حدیث کو نقل کیا ہے، اس کا حوالہ دے کر علامہ سیوطی رحمہ اللہ (م 911ھ) نے اپنى کتاب "تمہید الفرش" ص 69، ط: المکتب الإسلامی، میں اس حدیث کو نقل کیا ہے۔
حدیث کى اسنادى حیثیت:
اس حدیث کے رواۃ میں سے کسى پر جرح نہیں کى گئى ہے۔
۲) حدیثِ انس بن مالک رضی اللہ عنہ
اس حدیث کے الفاظ وہى ہیں جو حدیث ِجابر بن عبداللہ رضی اللہ عنہما میں آچکے ہیں۔
تخریج الحدیث:
امام ابو عمرو محمد بن یحیى بن الحسن الجوری النیسابوری رحمہ اللہ (م 427ھ) نے اپنى کتاب "قوارع القرآن" ص 107رقم الحدیث (52)، ط: مکتبۃ المعارف الریاض میں اس حدیث کو نقل کیا ہے۔
حدیث کى اسنادى حیثیت:
اس حدیث کے راوى "ابراہیم بن الحکم بن ظہیر الکوفى"کے متعلق حافظ ذہبى رحمہ اللہ (م 748ھ) نے اپنى کتاب "میزان الاعتدال" 1/ 146 ، ط: دار الکتب العلمیة بیروت میں یہ نقل کیا ہے: یہ راوى سخت شیعہ ہے، امام ابو حاتم رحمہ اللہ نے اسے کذاب قرار دیا ہے اور امام دار قطنی رحمہ اللہ نے اس کو ضعیف قراردیا ہے۔
۳) حدیثِ عبد اللہ بن عباس رضی اللہ عنہما
اس حدیث کے الفاظ حدیثِ جابر بن عبد اللہ رضی اللہ عنہما کى طرح ہیں۔
تخریج الحدیث:
اس حدیث کو حافظ ابن حجر عسقلانی رحمہ اللہ (م 852ھ) نے اپنى کتاب "الأمالی المطلقۃ" ص 204 ، ط: المکتب الإسلامی، میں نقل کیا ہے۔
حدیث کى اسنادى حیثیت:
۱) اس حدیث کو خود حافظ ابن حجر عسقلانی رحمہ اللہ نے "غریب" قرار دیا ہے، اس حدیث میں راوى "ابراہیم بن إسحاق" کى وجہ سے یہ حدیث "غریب " قرار دى گئی ہے۔
۲) علامہ سیوطی رحمہ اللہ (م 911ھ) نے اس حدیث کو اپنى تفسیر "الدر المنثور" 6/ 10، میں نقل کرنے کے بعد اس کى سند کو "واہٍ" (ضعیف) قرار دیا ہے۔
خلاصہ بحث:
سورۃ الأنعام کی ابتدائی تین آیات کی فضیلت مندرجہ بالا چار احادیث سے ثابت ہے، اگرچہ ان احادیث کے بعض راویوں پر محدثین نے کلام کیا ہے، لیکن وہ زیادہ سخت کلام نہیں ہے، نیز یہ احادیث ایک دوسرے کا شاھد بن کر ایک دوسرے کی تقویت کا باعث بھی ہیں، لہذا فی الجملہ سورۃ الأنعام کی ابتدائی تین آیات کی فضیلت کے متعلق احادیث ثابت ہیں، لہذا ان احادیث میں بیان کردہ فضیلت کو حاصل کرنے کے لیے حسب توفیق سورۃ الأنعام کی ابتدائی آیات کو فجر کی نماز کے بعد پڑھنا چاہیے اور ان احادیث کو راویوں کے ضعف کی صراحت کے ساتھ بیان کرنے کی بھی گنجائش ہے۔